შს მინისტრი ალექსანდრე ჭიკაიძე მეტყევე-რეინჯერის დავით ცინდელიანის საქმის გახსნას ეხმიანება და აცხადებს, რომ ყველა მსგავსი საქმე გამოძიებული და ბოლომდე მიყვანილი იქნება. როგორც ჭიკაიძემ ჟურნალისტებთან საკითხის კომენტირებისას განაცხადა შემაშფოთებელია, როდესაც საკუთარ მოქალაქეებზე ძალადობას სახელმწიფო სტრუქტურის წარმომადგენელი.
,,შემაშფოთებელია ეს საქმე ჩვენი ქვეყნისთვის, ჩვენი მოსახლეობისთვის, ჩვენი მოქალაქეებისთვის. სახელმწიფო სტრუქტურის წარმომადგენლები არ უნდა ძალადობდნენ მოქალაქეებზე. მითუმეტეს, ასეთი საშუალებით, ასეთი ფორმით. ეს მიუღებელია დემოკრატიული სახელმწიფოსთვის და ყველა ასეთი საქმე ბოლომდე იქნება მიყვანილი, გამოძიებული და ყველა შესაბამისად აგებს პასუხს კანონის წინაშე", _განაცხადა ჭიკაიძემ.
შეგახსენებთ, რომ შინაგან საქმეთა სამინისტროს სახელმწიფო უსაფრთხოების სააგენტოს და საქართველოს მთავარი პროკურატურის თანამშრომლების მიერ ერთობლივად ჩატარებული საგამოძიებო-ოპერატიული ღონისძიებების შედეგად მეტყევე-რეინჯერ დავით ცინდელიანის საქმე გაიხსნა და შინაგან საქმეთა სამინისტროს კონსტიტუციური უსაფრთხოების დეპარტამენტის აფხაზეთის მთავარი სამმართველოს ყოფილ უფროსს რომან შამათავას სატყეო დეპარტამენტის მეტყევე-რეინჯერ დათო ცინდელიანის საქმეზე ბრალი დაუმძიმდა. რომან შამათავას ბრალი ასევე რამდენიმე დღის წინათაც დაუმძიმდა. კერძოდ, თავდაცვის სამინისტროს დაზვერვის ოფიცრის პაატა ქარდავას გაუჩინარებისა და მკვლელობის საქმესთან დაკავშირებით.
