NDI-ის ინფორმაციით, საარჩევნო კამპანიასთან დაკავშირებული ზეწოლისა და ძალადობის კუთხით წუხილი კვლავ რჩება.

,,NDI-ის საზოგადოებრივი აზრის კვლევების თანახმად, მოქალაქეებს აქვთ მოლოდინი, რომ არჩევნები კარგად ჩატარდება. NDI-ის გრძელვადიანი ანალიტიკოსებისა და ადგილობრივი დამკვირვებლების დაკვირვებით, ამ დრომდე საარჩევნო ადმინისტრაციის ყველა დონემ საკუთარი მოვალეობები კანონით დადგენილი ვადების დაცვით განახორციელა. ზოგადად, პოლიტიკური პარტიები და სამოქალაქო საზოგადოების წარმომადგენლები ცესკოსა და საოლქო საარჩევნო კომისიების საქმიანობას პოზიტიურად აფასებენ და, წინა არჩევნებთან შედარებით, მათ გაზრდილ პროფესიონალიზმზე მიუთითებენ. NDI და ადგილობრივი დამკვირვებლები დაესწრნენ საოლქო და საუბნო საარჩევნო კომისიის წევრების ტრენინგებს და აღნიშნეს, რომ ტრენინგები არის პროფესიული, თანმიმდევრული, ინტერაქტიული და დასწრების მაღალი დონით გამოირჩევა. საჭიროების შემთხვევაში ტრენინგები უმცირესობების ენებზე ჩატარდა", _აღნიშნულია NDI-ის 2014 წლის 15 ივნისს დაგეგმილი ადგილობრივი არჩევნებისთვის წინამდებარე შუალედურ ანგარიშში.

საანგარიშო პერიოდის განმავლობაში, რომელიც 18 მაისიდან 6 ივნისამდე პერიოდს მოიცავს, მისიის წევრებმა მოინახულეს 36 საარჩევნო ოლქი, ჩაატარეს 225-ზე მეტი შეხვედრა მთავრობისა და საარჩევნო ადმინისტრაციის თანამდებობის პირებთან, პოლიტიკური პარტიების წარმომადგენლებთან, სამოქალაქო საზოგადოებასა და მედიასთან და დაესწრნენ საარჩევნო კამპანიის ღონისძიებებს, ასევე ცენტრალური საარჩევნო კომისიის (ცესკო) სხდომებსა და არჩევნებთან დაკავშირებულ სხვა ღონისძიებებს. NDI-ის ანალიტიკოსები საარჩევნო პროცესებს არჩევნების დღესა და არჩევნების შემდგომ პერიოდშიც შეაფასებენ. NDI ყველა საერთაშორისო სადამკვირვებლო მისიას „არჩევნებზე საერთაშორისო დაკვირვების პრინციპების შესახებ დეკლარაციის" და მისი თანმხლები „საერთაშორისო საარჩევნო დამკვირვებლების ქცევის კოდექსის" შესაბამისად ახორციელებს. ამ პრინციპებს მხარს 48 წამყვანი საერთაშორისო საარჩევნო სადამკვირვებლო ორგანიზაცია უჭერს.