საქართველოს იუსტიციის სამინისტროს ეროვნული არქივი 9 ივნისს არქივების საერთაშორისო დღეს აღნიშნავს. არქივის ადმინისტრაციული შენობის წინ გაიხსნება ფოტოგამოფენა, სადაც წარმოდგენილი იქნება საქართველოსა და საზღვარგარეთის არქივებში დაცული მასალები. კერძოდ, დოკუმენტები, რომლებიც ჩვენი ქვეყნის შესახებ საზღვარგარეთის არქივებში ინახება და ეროვნული არქივის მასალები, რომელიც საზღვარგარეთის ქვეყნების ისტორიასთან ასახავს.
არქივების საერთაშორისო დღედ 9 ივნისი ვენაში 2004 წელს გამართულ არქივების საერთაშორისო საბჭოს კონგრესზე გამოცხადდა. ეს თარიღი უკავშირდება 1948 წელს გაერთიანებული ერების განათლების, მეცნიერებისა და კულტურის ორგანიზაციის (UNESCO) მიერ არქივების საერთაშორისო საბჭოს დაარსებას.
ეროვნული არქივი მჭიდროდ თანამშრომლობს როგორც არქივების საერთაშორისო საბჭოსთან, ისე საზღვარგარეთის ქვეყნების არქივებთან. თანამშრომლობის შედეგად საარქივო უწყებებს შორის დოკუმენტების ასლების გაცვლა მიმდინარეობს, რითაც, ერთი მხრივ, მდიდრდება საქართველოს ეროვნული საარქივო ფონდი და, მეორე მხრივ, საერთაშორისო საზოგადოებისათვის ხელმისაწვდომი ხდება ეროვნულ არქივში დაცული მასალები.
გამოფენის პარალელურად, ეროვნული არქივის თანამშრომლები ღონისძიებაზე მისულ სტუმრებს მიაწვდიან ინფორმაციას ეროვნული არქივის მუშაობის თაობაზე და უპასუხებენ მათ კითხვებს.
აღსანიშნავია, რომ არქივების საერთაშორისო საბჭო არქივების საერთაშორისო დღესთან დაკავშირებით საკუთარ საიტზე: www.ica.org - ქმნის სპეციალურ გვერდს, სადაც განთავსებული იქნება ორგანიზაციის წევრი ქვეყნების არქივებში დაცული დოკუმენტები. საქართველოს ეროვნული არქივის მხრიდან აქ განსათავსებლად შეირჩა ვახუშტი ბატონიშვილის რუკა, რომელიც 2013 წელს გაერთიანებული ერების განათლების, მეცნიერებისა და კულტურის ორგანიზაციამ მსოფლიო მემკვიდრეობის საერთაშორისო რეესტრში შეიტანა.
