პრემიერ-მინისტრი ირაკლი ღარიბაშვილის განცხადებით, შერიგებისა და თანასწორობის საკითხებში სახელმწიფო მინისტრის პაატა ზაქარეიშვილის გადაყენებას არ აპირებს.
აღნიშნულის შესახებ ირაკლი ღარიბაშვილმა დღევენდელ პრესკონფერენციაზე ჟურნალისტის მიერ დასმულ შეკითხვასთან დაკავშირებით განაცხადა, ადგილობრივი თვითმმართველობის არჩევნების შემდეგ არის თუ არა მოსალოდნელი საკადრო ცვლილებები და მათ შორის პაატა ზაქარეიშვილის თანამდებობიდან გადაყენება.
"რაც შეეხება პაატა ზაქარეიშვილის შეცვლა-არშეცვლის საკითხს, მის შეცვლას მე არ ვაპირებ. ის ძალიან კარგად, ეფექტურად მუშაობს და არ მესმის რატომ უნდა შევცვალო. მის სამინისტროზე იმიტომ არ ვისაუბრე, რომ დრო დაგვეზოგა აღარ წავედი დეტალებში. მთავარი, რაც ამ სამინისტრომ და მთავრობამ გააკეთა, სიმბოლური იყო, თუნდაც სამინისტროს სახელის შეცვლა. ამ სამინისტროს ერქვა რეინტეგრაციის სამინისტრო და ჩვენ დავარქვით შერიგებისა და სამოქალაქო თანასწორობის საკითხებში სამინისტრო. ამ სახელიდან ჩანს ჩვენი პოლიტიკა, დამოკიდებულება და მიდგომა იგივე აფხაზეთთან, ოსებთან და ზოგადად უმცირესობებთან მიმართებაში. მიმაჩნია, რომ პაატა კარგად მუშაობს, აკეთებს იმას, რაც შეუძლია გააკეთოს. იმაზე მეტს ვერ მოვთხოვთ, რისი გაკეთებაც შეუძლებელია ამ ეტაპზე," -განაცხადა პრემიერ-მინისტრმა.
მისი შეფასებით, მთავრობის მიერ გამყოფი ხაზების მიმდებარე სოფლებში არსებული პრობლემებისა და საჭიროებების მოგვარების კუთხით, იმაზე მეტია გაკეთებული, რაც ჩანს და შუქდება.
კონფლიქტისპირა სოფლების რაოდენობა ირაკლი ღარიბაშვილის ინფორმაციით 48-ს შეადგენს.