საქართველოს პრემიერ-მინისტრ ირაკლი ღარიბაშვილის აზრით, ფარულ მოსმენებზე წვდომის ე. წ. გასაღები მობილური ოპერატორების ხელში არ უნდა იყოს.
აღნიშნულის თაობაზე „ექსპო ჯორჯიაში" გამართულ პრესკონფერენციაზე, ფარული მოსმენების შესახებ ირაკლი ღარიბაშვილმა კანონპროექტის თაობაზე დასმულ შეკითხვაზე საპასუხოდ განაცხადა, თუ ვის უნდა ჰქონდეს ე. წ. „გასაღები", ანუ წვდომა ფარულ მოსმენებზე. ღარიბაშვილის თქმით, არავითარი „გასაღები" არ არსებობს და ატყუებენ მოსახლეობას. „წვდომა, გასაგებია აქვს, მაგრამ ჩვენ ერთი მხრივ, უნდა მოვაწესრიგოთ ეს სისტემა , რომ არ განმეორდეს უკანონო მოსმენების დრო. მხოლოდ ნება არ არის საკმარისი. სწორედ ამ მიზნით, ეს კანონი პირველი მოსმენით მივიღეთ. რაც შეეხება შეკითხვას, „გასაღები" ვის ხელში უნდა იყოს, ჩვენ გვაქვს სურვილი და რეალური მოტივაცია, ავაშენოთ ძლიერი სახელმწიფო. ასეთი ძლიერ სახელმწიფოში უმაღლეს დონეზე უნდა იყოს დაცული უსაფრთხოება. ამ ეტაპზე მიმაჩნია, რომ ეს ე. წ. „გასაღები" არ უნდა იყოს მობილური ოპერატორების ხელში, ეს არასწორია", - განაცხადა ირაკლი ღარიბაშვილმა.
მისივე თქმით, არსებობს სახელმწიფო უსაფრთხოების საკითხები, რომელზეც ღიად საუბარი არ შეიძლება და რომელზეც უსაფრთხოების სამსახურები მუდმივ რეჟიმში ზრუნავენ.
„გარწმუნებთ, რომ ჩვენ გავაკეთებთ მაქსიმალურად მოქნილ და დაბალანსებულ მექანიზმს, რაც, ერთი მხრივ, გამორიცხავს უკანონო მოსმენებს და მეორე მხრივ, უზრუნველყოფს სახელმწიფო უსაფრთხოების დაცვას. ჩვენ ამ იდეალურ ბალანსს, ოქროს შუალედს აუცილებლად ვიპოვით", - განაცხადა ღარიბაშვილმა.
მისივე თქმით, სახელმწიფო ინტერესების შელახვას და უსაფრთხოების შესუსტებას არ დაუშვებს.
