პრემიერ-მინისტრი ირაკლი ღარიბაშვილი აჭარაში თურქი მესაზღვრეების საქართველოს ტერიტორიაზე გადმოსვლას არ ადასტურებს.
ამის შესახებ ირაკლი ღარიბაშვილმა „ექსპო ჯორჯიაში" გამართულ დღევანდელ პრესკონფერენციაზე, სოფლების: კირნათისა და მარადიდის მოსახლეობისა და თურქ მესაზღვრეებს შორის დაპირისპირების შესახებ დასმული კითხვის საპასუხოდ და იმ ინფორმაციის საპასუხოდ განაცხადა, რომლის თანახმადაც, თურქი მესაზღვრეები საქართველოს ტერიტორიაზე გადმოვიდნენ და ადგილობრივ მოსახლეობას თავიანთ ნაკვეთებში მუშაობაში ხელს უშლიან.
პრემიერის განცხადებით, ამასთან დაკავშირებით საზღვრის დაცვის სამსახურმა გაავრცელა განცხადება და მედია-საშუალებებს მოუწოდა, დეზინფორმაცია არ გაავრცელონ.
„ეს არის ის ინფორმაცია, რაც მე მაქვს, არავითარი გადმოკვეთა, სპეცრაზმის გადმოსვლა და ა. შ. რაღაც გაუგონარი რაღაცეები მოვისმინეთ. ოდიოზური ადამიანების მიერ იყო ეს კომენტარები გაკეთებული. ამას მიხედავენ შესაბამისი უწყებები" - განაცხადა ღარიბაშვილმა.
