"ერთიანი ნაციონალური მოძრაობის" ერთერთი ლიდერის გიგა ბოკერიას შეფასებით, ოკუპირებულ აფხაზეთში შექმნილი ვითარება საქართველოსთვის სახიფათოა.
როგორც ბოკერიამ ჟურნალისტებს განუცხადა, აფხაზეთში განვითარებულ მოვლენებთან დაკავშირებით საქართველოს ხელისუფლება უნდა იყოს ფხიზლად და ფხიზლად ამყოფოს საერთაშორისო საზოგადოება.
მისი თქმით, ისედაც ნათელია, რომ რუსეთის ფედერაცია მარიონეტული რეჟიმის მეშვეობით ყველა გადაწყვეტილებაზე სრულ კონტროლს ახორციელებს.
"ოკუპირებულ აფხაზეთში შექმნილი ვითარება სახიფათოა საქართველოსთვის. ისედაც ნათელია, რომ რუსეთის ფედერაცია მარიონეტული რეჟიმის მეშვეობით ყველა გადაწყვეტილებაზე სრულ კონტროლს ახორციელებს. ცვლილება, რაც ახლა მოხდა, რა თქმა უნდა, კლანების ძალაუფლებისთვის ბრძოლასაც უკავშირდება, მაგრამ აშკარად ტოვებს უფრო სასურველი, განსხვავებული აზრის არმქონე ლიდერების მოყვანის სურვილის კვალს რუსეთის ფედერაციის მხრიდან. ჩვენთვის საგანგაშოა ის, რომ ლოზუნგები, რა ლოზუნგებითაც ამ პროცესის გაფორმება მოხდა, როგორც მინიმუმ არის დაკავშირებული ეთნიკური ქართველების შემდგომ შევიწროვებასთან, რაც ჩვენთვის დამატებითი საფრთხის შემცველია", - განუცხადა ჟურნალისტებს გიგა ბოკერიამ.
