საგარეო საქმეთა მინისტრის პირველი მოადგილის დავით ზალკალიანსა და ჟენევის საერთაშორისო მოლაპარაკებებში ეუთო-ს თავმჯდომარეობის სპეციალურ წარმომადგენელთან, მოლაპარაკებების თანათავმჯდომარესთან, ელჩ ანჯელო გნედინგერთან სატელეფონო საუბარი შედგა.
საგარეო უწყების ინფორმაციით, საუბრისას, ქართულმა მხარემ გამოხატა შეშფოთება აფხაზეთის ოკუპირებულ რეგიონში შექმნილი მდგომარეობის გამო და ხაზი გაუსვა საერთაშორისო თანამეგობრობის, უპირველესად, ჟენევის მოლაპარაკებების თანათავმჯდომარეების მხრიდან აქტიური ჩართულობის აუცილებლობას, მდგომარეობის შემდგომი ესკალაციის არდაშვების მიზნით. თავის მხრივ, ანჯელო გნედინგერმა განაცხადა, რომ ინფორმაციას შექმნილი ვითარების შესახებ და ქართული მხარის პოზიციას დაუყოვნებლივ მიაწვდის ეუთო-ს თავმჯდომარეობას.
დღესვე დავით ზალკალიანი შეხვდა ჟენევის მოლაპარაკებებში გაერო-ს გენერალური მდივნის სპეციალურ წარმომადგენელს, ჟენევის მოლაპარაკებების თანათავმჯდომარეს ანტი ტურუნენს და გაუზიარა მას შეშფოთება საქართველოს ოკუპირებულ ტერიტორიაზე მიმდინარე საგანგაშო პროცესებთან დაკავშირებით. აღნიშნული ინფორმაცია ბრიუსელში საქართველოს მისიის მეშვეობით ასევე მიეწოდა ევროკავშირის ხელმძღვანელობას, როგორც ჟენევის მოლაპარაკებების თანათავმჯდომარეს.
მასალის გამოყენების პირობები
