,ქართული ოცნების" რეგიონული სამსახური წყალტუბოში მომხდარ ინციდეტს ეხმიანება და განცხადებას ავრცელებს სადაც აღნიშნულია, რომ დაპირისპირებაში მონაწილე "ქართული ოცნების" წევრებს პარტიას დაატოვებინებენ. ,,ჯი-ეიჩ-ენი" გავრცელებულ განცხადებას უცვლელად გთავაზობთ: ,,საარჩევნო ბლოკ „ქართულ ოცნებას" წყალტუბოს რაიონში გააჩნია ერთადერთი საარჩევნო შტაბი, რომელიც მდებარეობს რუსთაველის ქ№4-ში და მისი ხელმძღვანელია ჯემალ ფანცხავა.ნებისმიერი სხვა ჯგუფი, რომელიც საუბრობს წყალტუბოს შტაბის სახელით, არის არაკეთილისმოსურნე ძალების მხრიდან მართული და ცდილობს, ხელოვნური პრობლემები შეუქმნას ჩვენი რაიონული ორგანიზაციის წინასაარჩევნო კამპანიას. აღსანიშნავია, რომ ოფისში შეჭრილ ადამიანებს თან ახლდა პარტია „ქართული ოცნება დემოკრატიული საქართველოს" რამდენიმე წევრიც, რომლებიც უმკაცრესად იქნებიან დასჯილნი და დატოვებენ ჩვენი პარტიის რიგებს. გვჯერა, რომ აღნიშნულ ინციდენტს შეისწავლიან სამართალდამცავი ორგანოებიც და კანონის შესაბამის გადაწყვეტილებას მიიღებენ. გვინდა ჩვენს მოსახლეობას ვუთხრათ, რომ მიუხედავად პროვოკაციების მცდელობისა, ჩვენ ადგილობრივი თვითმმართველობის არჩევნებს ჩავატარებთ მშვიდ და პოზიტიურ გარემოში და ერთად მივალთ საბოლოო გამარჯვებამდე", - ნათქვამია ,, ქართული ოცნების" რეგიონული სამსახურის განცხადებაში.
შეგახსენებთ, რომ წყალტუბოს "ქართული ოცნების" რაიონულ შტაბში, დაპირისპირება მოხდა. რაიონულ შტაბში, პარტიის წევრთა ერთი ნაწილი შეიჭრა, რომლებიც შტაბის უფროსს "ნაციონალური მოძრაობის" ყოფილი წევრების ლობირებაში ადანაშაულებენ და ითხოვენ, რომ საარჩევნო სიებიდან ამოიღონ "ნაციონალური მოძრაობის" ყოფილი წევრები.ბრალდებებს აბსურდულად მიიჩნევენ შტაბის წარმომადგენლები.
