კოალიცია "ქართული ოცნების" თბილისის მერობის კანდიდატი დავით ნარმანია მზად არის ყველა კანდიდატთან დებატებში დაჯდეს. ამის შესახებ ნარმანიამ ჟურნალისტებს ნიკა მელიას გუშინდელი შეთავაზების კომენტირებისას განუცხადა.
"ჩვენ მზად ვართ, ყველა კანდიდატთან ერთობლივ დებატებში მივიღოთ მონაწილეობა", - აღნიშნა ნარმანიამ.
"რაც შეეხება ცალკეულ ინიციატივებს, რომელიც გუშინდელ ყრილობაზე დასახელდა, მათ შორის აქციზის გადასახადების კლებასთან დაკავშირებით, არ განეკუთვნება ადგილობრივი თვითმმართველობის უფლებამოსილებას. ვერც თბილისის მერია და ვერც საკრებულო ვერანაირად ვერ შეამცირებს გადასახადს, ისევე როგორც ვერანაირად ვერ შეამცირებს იმ ტარიფებს, რომლებიც ბევრი თვალსაზრისით არსებობს. აქედან გამომდინარე, ოპონენტებს ვურჩევ, რომ თავიანთ დაპირებებში კარგად ჩაიხედონ, რადგან თბილისის მოსახლეობამ ძალიან კარგად იცის იმ უფლებამოსილებების შესახებ, რომელიც ადგილობრივ თვითმმართველობას აქვს", - აღნიშნა ნარმანიამ.
"ნაციონალური მოძრაობის" კონფერენციაზე, თბილისის მერობის კანდიდატმა ნიკა მელიამ საარჩევნო პროგრამაზე ისაუბრა და აღნიშნა, რომ საზოგადოებრივი ტრანსპორტით სარგებლობა სტუდენტებისთვის, სკოლის მოსწავლეებისთვის, პენსიონერებისა და სოციალურად დაუცველებისთვის უფასო იქნება; 20-თეთრამდე შემცირდება სხვა მოქალაქეებისთვის საზოგადოებრივი ტრანსპორტით სარგებლობა. მისი თქმით, ასევე მოხდება საშემოსავლო გადასახადების შემცირება და კომუნალური გადასახადები.
