თუ ანტიდისკრიმინაციის კანონის მიღება შეფერხდება, ვიზალიბერალიზაციის პროცესი გადაიდება, - განაცხადა ევროკავშირის წარმომადგენლობის ხელმძღვანელის მოადგილე ბორის იაროშევიჩმა ანტიდისკრიმინაციის შესახებ კანონპროექტს შეფასებისას.
მისი თქმით, ეს არის ადამიანის უფლებებთან დაკავშირებული საკითხი და არ ეხება მხოლოდ უმცირესობების დაცვას, არამედ, კანონპროექტი დისკრიმინაციისგან იცავს ქალებს, მუშახელს როგორც სამუშაო ადგილზე, ასევე ზოგადად.
"ეს არ არის მთლიანად ახალი კანონი. საქართველოში ამ უფლებების დაცვა სხვადასხვა კანონებით ხდებოდა. უბრალოდ, ახლა ერთ კანონში თავმოყრა ხდება. კანონი არ ქმნის ახალ უფლებებს. ის კონსოლიდაციას უკეთებს იმას, რაც აქამდე არსებობდა. ევროკავშირი და საქართველო ერთნაირ ღირებულებებს იზიარებენ. საქართველოს სურს, დაუახლოვდეს ევროპას, ამიტომ ჩვენ გვსურდა, მიეღოთ კანონი, რომელიც ევროკავშირის კანონმდებლობასთან შესაბამისობაში მოვიდოდა. ამ კანონს ერთსქესიან ქორწინებასთან კავშირი არ აქვს, ის მხოლოდ უმცირესობებს იცავს. მას კავშირი არ აქვს ასოცირების ხელშეკრულებასთან. ის გავლენას იქონიებს ვიზალიბერალიზაციის პროცესზე, თუ კი ამ კანონის მიღება შეფერხდება, ევროკავშირსა და საქართველოს შორის უვიზო მიმოსვლის პროცესი გადაიდება", - განაცხადა იაროშევიჩმა "მოამბესთან" ინტერვიუში.
ანტიდისკრიმინაციულ კანონპროექტზე დღეს ადამიანის უფლებათა დაცვის კომიტეტში იმსჯელებენ.
