საქართველოს პრეზიდენტი დღეს ნატოს სამეკავშირეო ოფისის ხელმძღვანელს უილიამ ლაჰიუს შეხვდა. მხარეებმა საქართველოს ჩრდილოატლანტიკური პერსპექტივა განიხილეს და ნატოში ინტეგრაციის პროცესის მიმდინარეობის თაობაზე იმსჯელეს. საუბარი ასევე შეეხო საქართველოს წინაშე არსებულ გარე და შიდა გამოწვევებს. უკრაინაში შექმნილი ვითარების გათვალისწინებით, შეხვედრის ერთ-ერთი მთავარი თემა რეგიონალური უსაფრთხოების, რეგიონის ქვეყნებს შორის ენერგეტიკულ და სატრანსპორტო სფეროებში თანამშრომლობის გაღრმავების პერსპექტივა იყო.
ამას გარდა, შეხვედრისას ნატოს მომავალი სამიტის შესახებ ისაუბრეს, რომელიც სექტემბერში დიდ ბრიტანეთში გაიმართება. მხარეებმა იმედი გამოთქვეს, რომ აღნიშნულ სამიტზე აისახება ის პროგრესი, რომელსაც ქვეყანამ ალიანსში ინტეგრაციის გზაზე მიაღწია.
„დღეს ჩვენ განვიხილეთ საქართველოში არსებული ვითარება, საგარეო პოლიტიკის ის გამოწვევები, რომელთა წინაშეც ქვეყანა დგას, ასევე ეროვნული უსაფრთხოების საკითხები. ჩვენ განსაკუთრებულად ვართ დაინტერესებული ეროვნული უშიშრობის საბჭოს როლითა და მისი მუშაობით, რადგან საქართველოს წინაშე დღეს დგას დიდი, სტრაგიული მნიშვნელობის გამოწვევები. ჩვენ ასევე ვიმსჯელეთ საქართველოს საშინაო პოლიტიკის, მოახლოებული არჩევნებისა და ნატოს სამიტის შესახებ. ნატო დაინტერესებულია საქართველოში ამჟამად არსებული ვითარებით, რადგან ჩვენ ვემზადებით საგარეო საქმეთა მინისტრების შეხვედრებისთვის. ამ მინისტერიალებზე კი ვადგენთ ნატოს სამიტის დღის წესრიგს. სწორედ ეს საკითხები იყო ჩვენი დღევანდელი საუბრის თემა", - განაცხადა უილიამ ლაჰიუმ.
--
