თუ რამეს ვნანობ, რა თქმა უნდა, ვნანობ ამას, რადგან ბევრს მე გავუხსენი პოლიტიკაში კარი, ამის შესახებ დედაქალაქის უფლებაშეჩერებულმა მერმა გიგი უგულავამ ტელეკომპანია „იმედის" გადაცემა რეაქციაში განაცხადა.
უგულავამ "ნაციონალური მოძრაობიდან" მმართველ გუნდში გადასული საკრებულოს წევრებზე საუბრისას აღნიშნა, რომ მან "პრევენცია ვერ მოახდინა", რის გამოც "ნაციონალური მოძრაობა" 1-ელი ოქტომბრის არჩევნებზე "დაისაჯა".
"ესაა ის პრეტენზია, რომელსაც ვიღებ და თუ რამეს ვნანობ, რა თქმა უნდა, ვნანობ ამას, რადგან ბევრს მე გავუხსენი პოლიტიკაში კარი ან მე ვერ შევძელი პრევენცია მომეხდინა. ბუნებრივია, ეს პრობლემაა და ერთ-ერთი მიზეზი იმისა, რომ "ნაციონალურმა მოძრაობამ" წააგო თავის დროზე, სწორედ ეს არის. პოლიტიკაში დაუწერელი აქსიომა არსებობს და ერთა ძველმა პოლიტიკოსმაც თქვა, რომ როცა ოპოზიციაში ხარ, როგორც წესი, უფრო გიჟები გეწებებიან, ხოლო როცა ხარ ხელისუფლებაში - საშოვარზე მოსული ნაძირლები. როგორც ჩანს, ასეთი რამ გარდაუვალია და სწორედ ამან განაპირობა მათ შორის ერთ-ერთი ის პრობლემა, რომელიც "ნაციონალურ მოძრაობას" დაუდგა და რომლის გამოც, სრულიად სამართლიანად ვიტყოდი, 1-ელ ოქტომბერს დაისაჯა", - განაცხადა უგულავამ ინგრა გრიგოლიას გადაცემა „რეაქციაში".
