საქართველოს სახალხო დამცველმა უჩა ნანუაშვილმა შუამდგომლობით მიმართა საქართველოს შრომის, ჯანმრთელობისა და სოციალური დაცვის მინისტრს დავით სერგეენკოს მაღალმთიან რეგიონებში სოციალური მომსახურების რაიონული ცენტრების ტრანსპორტით უზრუნველყოფასთან დაკავშირებით.
,,2013 წლის სექტემბერ-ნოემბერში სახალხო დამცველის ბავშვის უფლებების ცენტრმა, გაეროს ბავშვთა ფონდის (UNICEF) მხარდაჭერით განახორციელა ვიზიტი ხულოს, შუახევის, ქედას, ახმეტისა და სტეფანწმინდის რაიონებში.
აღნიშნულ რაიონებში არსებულ სხვა პრობლემებთან ერთად, გამოიკვეთა, რომ არცერთ ამ რაიონში სოციალური მომსახურების ცენტრებს არ ემსახურება სატრანსპორტო საშუალება, რაც სერიოზულ სირთულეებს წარმოშობს სოციალური მომსახურების რაიონული ცენტრების მხრიდან საკუთარი მოვალეობების შესრულების პროცესში.
სოფელთა უმრავლესობა ჩვეულებრივი მსუბუქი ავტომანქანისთვის მიუვალია, არ მოძრაობს რაიონულ ცენტრებთან დამაკავშირებელი სამარშუტო ტაქსი და ავტობუსი. ზამთრის პერიოდში სააგენტოს თანამშრომლები ფაქტობრივად ვერ ახერხებენ სოფლებში ჩასვლას. წელიწადის სხვა დროსაც ძირითადად საკუთარი ხარჯებით გადაადგილდებიან და ხშირად, უტრანსპორტობის გამო ღამე დარჩენა უწევთ. სამსახურეობრივი მოვალეობის შესასრულებლად, თანამშრომლები მაღალმთიან სოფლებში ხშირად ფეხითაც მიდიან.
საკუთარი მოვალეობების განსახორციელებლად სააგენტოს, მათ შორის რაიონულ განყოფილებებს, პირველ რიგში, ესაჭიროება შესაბამისი ინფორმაცია, რათა შემდგომ ყველა კონკრეტულ შემთხვევაში მოახდინოს ადეკვატური რეაგირება. შესაბამისი სატრანსპორტო საშუალებების არარსებობა ართულებს და ზოგჯერ შეუძლებელს ხდის სოციალური აგენტების მხრიდან სოფლებში გადაადგილებას, უტრანსპორტობა აფერხებს სააგენტოს მხრიდან გადაუდებელი აუცილებლობის შემთხვევაში სწრაფი რეაგირების განხორციელებასაც", _ნათქვამია ნანუაშვილის მიმართვაში.