17 იანვარს, 12 საათზე, აშშ საერთაშორისო განვითარების სააგენტოს ეკონომიკური აღმავლობის ინიციატივა (EPI) და საქართველოს ინტელექტუალური საკუთრების ცენტრი, „საქპატენტი",ინტელექტუალური საკუთრების ახალი ელექტრონული რეგისტრაციის სისტემის პრეზენტაციას გამართავენ. პრეზენტაციას აშშ-ს ელჩი საქართველოში რიჩარდ ნორლანდი და „საქპატენტის" თავმჯდომარე ირაკლი ღვალაძე დაესწრებიან.
ინტელექტუალური საკუთრების ელექტრონული რეგისტრაციის სისტემის პროგრამული უზრუნველყოფა EPI-ს მხარდაჭერით შეიქმნა, ხოლო თავად პროგრამა შემუშავებულ და დანერგილ იქნა კომპანია „იუ-ჯი-თი-ს" მიერ. სისტემა უახლესი ტექნოლოგიის მიხედვითაა შექმნილი და ახდენს საქპატენტის პროცედურების სრულ ავტომატიზაციას, რაც გულისხმობს ინტელექტუალური საკუთრების ობიექტების ონლაინ რეგისტრაციასა და განაცხადების დამუშავებას, განმცხადებლებთან და პატენტ-რწმუნებულებთან კომუნიკაციას ქაღალდების გარეშე. მასში ინტეგრირებულია ონლაინ გადახდების სიტემა, რეგისტრირებული ობიექტების დისტანციურად/ავტომატურად გამოქვეყნება, საჭირო შეტყობინებები და სხვა ინტეგრირებული საკომუნიკაციო სისტემების ფუნქციები. ახალი სისტემის წყალობით ინტელექტუალურ საკუთრებასთან დაკავშირებული პროცესები გამარტივდება და უფრო გამჭვირვალე და სწრაფი გახდება.
ახალი ელექტრონული სისტემა მნიშვნელოვანწილად გააუმჯობესებს საქპატენტის მომსახურების ხარისხს. ამავდროულად, ის ხელს შეუწყობს საქართველოს ეკონომიკის ზრდასაც. ინტელექტუალური საკუთრების უფლებების დაცვა მსოფლიოში აღიარებულია ინოვაციისა და ეკონომიკური განვითარების მთავარ მამოძრავებელ ძალად. ინტელექტუალური საკუთრების მძლავრი ოფისები მსოფლიოს გარშემო აქტიურად ნერგავენ ინტელექტუალური საკუთრების ობიექტების რეგისტრაციისა და მართვის ავტომატიზირებულ ონლაინ სისტემებს, რათა დროულად და ზედმეტი დანახარჯების გარეშე უზრუნველყონ ინტელექტუალური საკუთრების დაცვა.
EPI-ს ეკონომიკური შეფასებით ახალი სისტემა სახელმწიფო და კერძო სექტორში არსებულ დაინტერესებულ პირებს ყოველწლიურად 4 მილიონი ლარის ოდენობის ხარჯს დაუზოგავს.