1. 2014 ბიუჯეტში წერია, რომ წელს საქართველოს ეკონომიკა იქნება 29 მილიარდი ლარი. მანამდე წარმოდგენილ ორ ვერსიაში ეწერა რომ იქნებოდა დაახლოებით 32 მილიარდი ლარი. ცდომილება არის დაახლოებით 3 მილიარდი. თქვენი აზრით რამდენად ნორმალურია, რომ დაახლოებით 1-1.5 თვის განმავლობაში მთავრობა მომავალი წლის ეკონომიკის მოცულობის პროგნოზში ცდებოდეს 3 მილიარდით, რაც დაახლოებით 10%-იანი ცდომილებაა?
2. შარშანწინ დეკემბერში, როდესაც მთავრობამ შემოიტანა 2013 წლის ბიუჯეტი, იქ მოცემული იყო გათვლები იმასთან დაკავშირებით თუ რა მოცულობის ვალის აღებას აპირებდა მთავრობა 2014 წელს. კერძოდ, 2014 წელს იგეგმებოდა დაახლოებით 85 მილიონი შიდა და 750 მილიონი საგარეო ვალის აღება. ამჟამად წარმოდგენილი 2014 წლის ბიუჯეტის მიხედვით თქვენ გეგმავთ 7-ჯერ მეტი შიდა ვალის (600 მილიონი) და 1.5-ჯერ მეტი (1 მილიარდი) საგარეო ვალის აღებას. და ამბობთ, რომ ამ ვალის აღება გიწევთ იმის გამო რომ წინა მთავრობამ დაგიტოვათ ბევრი ვალი. როდესაც შარშან შემოგქონდათ 2013 წლის ბიუჯეტი, მაშინ არ იცოდით რა მასშტაბის ვალები გექნებოდათ გასასტუმრებელი 2014 წელს თუ გამოგრჩათ ეს დეტალი ბიუჯეტის შედგენისას?
3. შარშანწინ დეკემბერში, როდესაც მთავრობამ შემოიტანა 2013 წლის ბიუჯეტი, იქ მოცემული იყო გათვლები იმასთან დაკავშირებით თუ რამდენი იქნებოდა მთავრობის ვალი მშპ-სთან მიმართებაში 2014 წელს. კერძოდ, თქვენს 2013 წლის ბიუჯეტში წერია, რომ 2014 წელს ვალი უნდა ყოფილიყო მშპ-ს 30.7%, ხოლო 2016 წელს ეს მაჩვენებელი უნდა ჩამოსულიყო 27.7%-მდე. დამტკიცებული ბიუჯეტის მიხედვით 2014 წელს ვალის მოცულობა იზრდება მშპ-ს 35.3%-მდე (დაახლოებით 5%-იანი ზრდა), ხოლო 2016 წელს იგივე მაჩვენებელი გაზრდილია 34.6%-მდე (დაახლოებით 7%-იანი ზრდა). როდესაც ერთი წლის განმავლობაში ბიუჯეტის დაგეგმვისას თქვენ უშვებთ ასეთი მასშტაბის ცდომილებას, და ამას უაპელაციოდ იღებს საპარლამენტო უმრავლესობა, 1. რა გარანტია გვაქვს, რომ მომავალ წელს იგივე არ დაგვემართება? 2. საერთოდ რა აზრი აქვს ამ გეგმის წარმოდგენას თუ თვითონ მთავრობა არ ხელმძღვანელობს ამ ციფრებით და ცვლის მათ იქიდან გამომდინარე როგორ დასჭირდება ექსელში ბალანსის დასმა?
4. 2011 წლის 7 ოქტომბერს, ყოფილმა პრემიერმა ივანიშვილმა გამოაქვეყნა თავისი პირველი წერილი, სადაც ვკიტხულობთ: „2004 წლიდან მოყოლებული რამდენჯერმე შევხვდი მიხეილ სააკაშვილს. ერთადერთი საკითხი, რომელიც სამჯერ წამოვწიე მასთან საუბარში, სოფლის მეურნეობის განვითარების პროექტი იყო. ჩემი აზრით, ეს პროექტი სწრაფ განხილვას მოითხოვდა და დასაწყისისთვის ერთი მილიარდი აშშ დოლარის ინვესტიციას საჭიროებდა. რამდენადაც ვიცოდი, რომ ქვეყნის ბიუჯეტს ამის შესაძლებლობა არ გააჩნდა, მიხეილ სააკაშვილს ამ პროექტის სრული დაფინანსება მე შევთავაზე." წარმოდგენილ 2014 წლის ბიუჯეტში სოფლის მეურნეობისთვის განკუთვნილ შემოსავლებში, გრანტების ნაწილში არ ჩანს ბ-ნი ივანიშვილის 1,6 მილიარდი. როგორც სჩანს არც მომავალ წელს აპირებს სოფლის მეურნეობაში 1 მიალირდი დოლარის ჩადებას? კოჰაბიტაცია დამთავრდა. სააკაშვილი აღარ არის პრეზიდენტი. ხომ არ აქვს ინფორმაცია მთავრობას ამჯერად რა უშლის ბ-ნ ივანიშვილს ამ 1 მილიარდის ინვესტიციის განხორციელებას?
5. დამტკიცებული ბიუჯეტის მიხედვით დაგეგმილია 200 მილიონი შიდა ვალის აღება, რომლითაც უნდა მოხდეს ეკონომიკის სტიმულირება. სქემა შემდეგია -მთავრობა სესხულობს ფულს კომერციული ბანკებისგან, შემდეგ ამ ნასესხებ ტანხას უბრუნებს იგივე კომერციულ ბანკებს, რომლებიც ამ ფულს გასცემენ სესხის სახით. ამასთან დაკავშირებით რამდენიმე შეკითხვა გვაქვს: 1. თუ ბანკებისთვის მომგებიანია ასეთი ტიპის სესხების გაცემა ეს ფული ხომ ისედაც მათია? რა საჭიროა ამ ფულის ჯერ მთავრობისთვის სესხება, შემდეგ უკან გამორთმევა და ისე გასესხება? 2. ვთქვათ დავიჯერეთ, რომ ასეთი ტიპის სტიმულირებას შეიძლება მართლა ჰქონდეს ეფექტი. რატომ ფიქრობთ, რომ 200 მილიონი არის ის თანხა, რომელიც საკმარისი იქნება ეკონომიკის სტიმულირებისთვის? ანუ რატომ 200 მილიონი და არა ვთქვათ 180 ან 420 მილიონი? როგორ დათვალეთ რომ ზუსტად 200 მილიონია სასურველი/საკმარისი? 3. კონკრეტულად რა ეფექტს ელით ასეთი სტიმულირებისგან? ანუ, მაგალითად რამდენი %-ით გაზრდის მშპ-ს ეს 200 მილიონიანი სტიმულირება 2014 წელს, 2015 წელს, 2020 წელს?