თბილისის მერის მოვალეობის შემსრულებლის სევდია უგრეხელიძის ვაკის პარკის მიმდებარედ სასტუმროს მშენებლობასთან დაკავშირებით კიდევ ერთ განმარტებას აკეთებს. განცხადებაში უგრეხელიძე მიუთითებს, რომ მოხდა მისი პოზიციის დამახინჯება და ამიტომ ის კიდევ ერთხელ განმარტავს, რომ რესტორან "ბუდაპეშტის" ადგილზე აშენდება თუ არა სასტუმრო, დაწყებული ადმინისტრაციული განხილვის ან სასამართლო განხილვის ფარგლებში გადაწყდება.
„ვინაიდან ვაკის რაიონში სასტუმროს მშენებლობასთან, დაკავშირებით უნებლიედ თუ მიზანმიმართულად მოხდა ჩემი პოზიციის დამახინჯებული ინტერპრეტირება, საჭიროდ მიმაჩნია დავაკონკრეტო და საზოგადოებას განვუმარტო, რომ რესტორან "ბუდაპეშტის" ადგილზე აშენდება თუ არა სასტუმრო, დაწყებული ადმინისტრაციული განხილვის ან სასამართლო განხილვის ფარგლებში გადაწყდება. ხოლო, რაც შეეხება ჩემს პირად მოსაზრებას მიმაჩნია, რომ შეთანხმებული პროექტი თბილისის განვითარებას მეტ სიკეთეს მოუტანს ვიდრე ზიანს და ის სწორედ ქალაქის ინტერესებს ემსახურება"- ნათქვამია განცხადებაში.