სარევიზიო კომისიის თავმჯდომარემ მიხეილ ქავთარაძემ ვაკე-საბურთალოს რაიონის გამგეობის შემოწმების შედეგები წარმოადგინა. როგორც ქავთარაძემ განმარტა გამოვლენილი კონკრეტული დარღვევების ამსახველი მასალები შემდგომი რეაგირებისთვის სამართალდამცავ უწყებებს გადაეგზავნება.
"ამ ეტაპზე გაგაცნობთ ვაკე-საბურთალოს რაიონის გამგეობაში ჩატარებული შემოწმების შედეგებს. საკვლევი პერიოდი მოიცავს 2012 წელს, რა პერიოდშიც გამოვლინდა შემდეგი სახის დარღვევები:
სადარბაზოებში მოძრაობის სენსორული სანათების დამონტაჟებისთვის გამოყოფილია 672 655 ლარი, საიდანაც დახარჯულია 617 790 ლარი. აღსანიშნავია, რომ ყველა ხელშეკრულება გაფორმებულია მხოლოდ ერთ მომსახურე ორგანიზაციასთან, შპს „თბილისი გრუპთან". ამ შემთხვევაში არსებობდა გამგეობის მიერ გამოცემული დადგენილების ძალადაკარგულად გამოცხადების საფუძველი, რადგან შემსრულებლის მიერ ფინანსური დოკუმენტაცია კანონით გათვალისწინებული ნორმების დარღვევით არის წარმოდგენილი. სპორტული მოედნების კოორდინატორებთან არ არის გაფორმებული ხელშეკრულებები. შესაბამისად, კოორდინატორებს რაიმე ვალდებულებები არ უფიქსირდებათ, თუმცა მიუხედავად ამისა, მათი წახალისებისთვის გახარჯულია 51 000 ლარი. გარდა ამისა, გამოიკვეთა რამდენიმე შემთხვევა, როდესაც გამგეობის მიერ მომსახურების შესყიდვა განხორციელდა გადაუდებელი აუცილებლობიდან გამომდინარე, თუმცა რეალურად ეს აუცილებლობა არ არსებობდა.
ამასთანავე, ხელშეკრულების შესრულების კონტროლი და ინსპექტირება გამგეობის მხრიდან არ ხდება, თუმცა ეს მისი პირდაპირი ვალდებულებაა", _განაცხადა ქავთარაძემ.
მისივე განმარტებით, სამშენებლო კომპანია „კოლხთან" გაფორმებული ხელშეკრულება შემსრულებელმა ვადაზე ადრე შეწყვიტა, თუმცა თებერვალში გაფორმებული ხელშეკრულების შეწყვეტის შესახებ გამგეობისთვის აგვისტოში გახდა ცნობილი, ისიც მხოლოდ შემსრულებელი კომპანიის მიერ გამგეობისთვის მიმართვის შემდეგ. ამის შემდეგ ვაკე-საბურთალოს გამგეობამ წერილობით მიმართა სადაზღვევო კომპანია „ალდაგი ბისიაი"-ს (რომელიც შპს „კოლხის" გარანტორი იყო) და აღნიშნა, რომ შემსრულებელ ორგანიზაციას ხელშეკრულებით გათვალისწინებული სამუშაოები საერთოდ არ შეუსრულებია და შესაბამისად, ავანსად გაცემული თანხა (249 003 ლარი) მიმართულია არამიზნობრივად.
როგორც ქავთარაძემ განაცხადა იგივე სამუშაოს შესრულებაზე გამგეობამ ერთ პირთან მოლაპარაკების გზით 1 000 000 ლარზე დადო ხელშეკრულება შპს „პარმასთან".
სარევიზიო კომისიის თავმჯდომარის განცხადებით, ასევე გადაუდებელი აუცილებლობიდან გამომდინარე, აგვისტოში ერთ პირთან მოლაპარაკების გზით გაფორმებულია ხელშეკრულება შპს „კომპანია ბლექ სი გრუპთან".
