მერის მოვალეობის შემსრულებელი სევდია უგრეხელიძე, საზოგადოების იმ ნაწილს, რომელიც ვაკის პარკის მახლობლად სასტუმროს მშენებლობას აპროტესტებს და ტერიტორიას ვაკის პარკის ტერიტორიად მიიჩნევს - საჯაროდ უცხადებს, რომ აღნიშნული ტერიტორია ვაკის პარკის ტერიტორია არ არის. როგორც სევდია უგრეხელიძემ დღეს მთავრობის სხდომის დასრულების შემდეგ განაცხადა, აღნიშნულის საკითხით მთავრობაც დაინტერესდა.
„მთავრობა დაინტერესდა ჩემი პოზიცია მოვახსენე. ჩაიხედავენ ალბათ. მათ კატეგორიული აზრი ამის შესახებ უაპელაციოდ და საკითხის შეუსწავლელად არ გამოუთქვამთ. მათ ზოგადად თქვეს ის, რასაც ზოგადად ჩვენც ვეთანხმებით, რომ განვითარება უნდა მოხდეს ისე მინიმალურად უნდა მოხდეს გარემოში ჩარევა. მაგრამ როდესაც საქმე გვაქვს კერძო საკუთრებასთან და ქალაქის განვითარებასთან, მინდა ავღნიშნო, რომ ეს არ არის ვაკის პარკის ტერიტორია"- განაცხადა თბილისის მერის მოვალეობის შემსრულებელმა.
როგორც სევდია უგრეხელიძე განმარტავს, სასტუმრო შენდება არა ვაკის პარკში, არამედ მის მახლობლად, კერძო ტერიტორიაზე.
„ეს არ არის ვაკის პარკის ტერიტორია და არის კერძო საკუთრება, რომელშიც ინვესტიციას ახორციელებს სასტუმროს აშენებს კერძო მესაკუთრე. პროექტი დამტკიცებულია კანონის შესაბამისად. კანონის შესაბამისადვე იყო გაცემული ნებართვა 9 ხის ჭრაზე. რაც შეეხება იმას თუ ეს რამდენად არის მისაღები თუ არ არის მისაღები საზოგადოებისთვის, მინდა ვთქვა, რომ ყოველთვის ვდგავართ იმ ალტერნატივის წინაშე განხორციელდეს მშენებლობა განვითარდეს ქალაქი, შეიქმნას ახალი სამუშაო ადგილები, თუ ხელშეუხებლად იყოს მაგალითად რესტორან „ბუდაპეშტის" ნანგრევები და დარბოდნენ ვირთხები. ამ ალტერნატივის შემთხვევაში, როდესაც ჩვენ ვირჩევთ განვითარებას, დასაქმებას, ტურიზმის განვითარებას და სასტუმროს მშენებლობას- ჩვენ ნამდვილად ვერ ვიტყვით, რომ ცუდი არჩევანი გავაკეთეთ"- განმარტავს სევდია უგრეხელიძე.
