პედაგოგებისთვის პირადობის ახალი მოწმობების უფასოდ გაცემის აქციით ამ დრომდე უკვე 13 000-ზე მეტმა პედაგოგმა ისარგებლა. აქცია 2013 წლის 23 დეკემბერს დაიწყო და მიმდინარე წლის 23 იანვრამდე გასტანს.
სტატისტიკური მონაცემებით, იუსტიციის სახლებსა და სერვისების განვითარების სააგენტოს ტერიტორიულ სამსახურებს 23 დეკემბრიდან დღემდე უკვე 13 000-ზე მეტმა პედაგოგმა მიმართა, აქედან 9 000-მდე პედაგოგმა უკვე მიიღო მზა დოკუმენტი.
აქცია იუსტიციის მინისტრის ინიციატივით ხორციელდება - კერძოდ, საჯარო და კერძო სკოლების პედაგოგებს, რომლებსაც პირადობის მოწმობა ჯერ არ აუღიათ, საშუალება ეძლევათ, პირადობის ახალი დოკუმენტი სრულიად უფასოდ მიიღონ.
აღსანიშნავია, რომ აქციით სარგებლობისათვის პედაგოგებს არავითარი დამატებითი დოკუმენტაციის წარდგენა არ მოეთხოვებათ, რადგან მათი იდენტიფიცირება მონაცემთა ბაზის მიხედვით ხორციელდება.
პირადობის ახალი მოწმობის უფასოდ მისაღებად, 23 იანვრის ჩათვლით, თბილისში, პედაგოგებმა შემდეგ სერვისცენტრებს უნდა მიმართონ: დავით აღმაშენებლის ხეივანი მე-10 კილომეტრი, (აღსრულების ეროვნული ბიურო); ვაჟა-ფშველას #1, (ეროვნული არქივი); აღმაშენებლის გამზირი 89/24 საჯარო რეესტრის თბილისის სარეგისტრაციო სამსახური (მარჯანიშვილის მეტროსთან). მზა დოკუმენტების მიღება კი შესაძლებელია იუსტიციის სახლის შენობის მარცხენა მხარეს. დროებითი ფილიალები მომხმარებლებს 09:00 საათიდან 19:00 საათამდე მოემსახურებიან.
რაც შეეხება რეგიონებს პედაგოგებს, მათ სერვისების განვითარების სააგენტოს ტერიტორიული სამსახურები და იუსტიციის სახლის რეგიონული ფილიალები მოემსახურებიან.
2013 წელს იუსტიციის მინისტრის ინიციატივით, უფასო პირადობის მოწმობები უკვე გადაეცათ სრულწლოვან დევნილებსა და რეგისტრაციიდან მოხსნილ პირებს. აქციების ფარგლებში, საერთო ჯამში 75 000-მდე უფასო პირადობის მოწმობა გაიცა.