„ადამიანი, კანონი, თავისუფლება" სამინისტროებისათვის ნაჩუქარი უძრავ-მოძრავი ქონების შესახებ ახალ ინფორმაციას აქვეყნებს. კვლევის ფარგლებში ეკონომიკისა და მდგრადი განვითარების სამინისტროს მხრიდან მოწოდებული იქნა ყველა იმ ხელშეკრულებების ასლები და სხვა დოკუმენტები, რომლებიც ადასტურებს სხვადასხვა კომპანიების მხრიდან სამინისტროსთვის ქონების უსასყიდლოდ გადაცემას. 1700 ფურცელზე არსებული ინფორმაციის საფუძველზე დგინდება, რომ 2008 წლის იანვრიდან 2012 წლის ივლისის ჩათვლით (მას შემდეგ საჩუქრად ქონების გადაცემა არ ფიქსირდება) ეკონომიკისა და მდგრადი განვითარების სამინისტროს 322 820 983,62 ლარის და 3 097 231,00 აშშ დოლარის უძრავ-მოძრავი ქონება მიიღო საჩუქრად. აქედან 9 249 034,79 ლარის და 2 736 331 აშშ დოლარის ღირებულების ავტომანქანა გადაეცა.
მჩუქებელ კომპანიებში გვხვდება ცნობილი ბრენდები. კერძოდ, „ტოიოტა ცენტრი თბილისი", „მათე მოტორსი", „გუდვილი", „ირაო", „იბერია ავტო" და მრავალი სხვა. მათ მიერ ნაჩუქარი ავტომანქანების ღირებულება შეადგენს 3 585 558 ლარს და 2 615 831 აშშ. დოლარს.
მოწოდებული მასალებიდან ასევე ირკვევა რომ სამინისტროს, ნაციონალური მოძრაობის მართველობის პერიოდში გადაეცემოდა მილიონობით ლარის ღირებულების წილები სხვადასხვა კომპანიებში, რომელიც რატომღას თარიღების მიხედვითაც კი ემთხვევა ერთმანეთს.
მნიშვნელოვანია აღინიშნოს, რომ 2008 წლის აგვისტოშიც, სექტემბერშიც, ნოემბერშიც და დეკემბერშიც, მაშინ როდესაც ქვეყანაში უმძიმესი მდგომარეობა იყო, ქართულ ბიზნესს იმდენად ულხინდა რომ არ იშურებდა მთავრობისთვის ავტომანქანებს, წილებს, ცეცხლსასრულ იარაღს და სხვა ქონებას.
ჩვენთვის მოწოდებული ინფორმაციის თანახმად, არსებობს ნაჩუქარი ქონება, რომლის ღირებულება ხელშეკრულებაში მითითებული არაა და ამ ეტაპზე მიმდინარეობს ამ მონაცემების დაზუსტება.
ადამიანი, კანონი, თავისუფლება უახლოეს მომავალში წარმოადგენს კვლევას, სადაც დეტალურად იქნება მოცემული ყველა უწყებისთვის გადაცემული ქონებების შესახებ ინფრომაცია, მათი ღირებულება და ის კომპანიები, რომლებიც ფიქსირდებიან მჩუქებლებად.
