საქართველოს საპატრიარქო საშობაო ეპისტოლეზე განმარტებას აკეთებს. აღნიშნულთან დაკავშირებით სპეციალური განმარტება საპატრიარქოს ქორეპისკოპოსმა თეოდორე ჭუაძემ გააკეთა.
მისივე განმარტებით, თითქოს, ეკლესია სუროგაციისა და ხელოვნური განაყოფიერების გზით დაბადებულ ბავშვებს უპირისპირდება, სრული აბსურდია.
,, სრულიად საქართველოს პატრიარქის საშობაო ეპისტოლემ საზოგადოებაში დიდი და დადებითი გამოხმაურება გამოიწვია, ერთი ნაწილი კი გააღიზიანა იმ ადგილმა სადაც სუროგტ დედებსა და ხელოვნურ განაყოფიერებაზეა საუბარი. ზოგიერთმა ისიც კი ჩათვალა, თითქოს, ეკლესია ასეთი მეთოდით დაბადებულ ბავშვებს უპირისპირდება, რაც სრული აბსურდია, პირიქით, ამ პატარებს ეკლესიისგან მეტი სითბო სიყვარული და დალოცვა სჭირდება. ამიტომაც არის რომ ასეთი ბავშვები პატრიარქის ნათლულებიც არიან და ამაში გასაკვირი არაფერია, თუმცა ეს არ ნიშნავს რომ, თითქოს, აღნიშნული მეთოდი მისაღებია. შევნიშნავთ იმასაც რომ თითქმის ყველა ტრადიციული რელიგია ეწინააღმდეგება მას და ცოდვად მიიჩნევს. კათოლიკოს პატრიარქიც და სასულიერო პირებიც ვალდებულნი არიან აღნიშნულის შესახებ გააფრთხილონ მრევლი და საერთოდ საზოგადოება. ეკლესია პატივს სცემს ნებისმიერი ადამიანის თავისუფალ არჩევანს, მაგრამ სადაც თვლის, რომ არასწორ ქმედებას აქვს ადგილი უთითებს, ეს ეკლესიის მოვალეობაა", _განაცხადა საქართველოს საპატრიარქოს ქორეპისკოპოსმა თეოდორე ჭუაძემ.