შეერთებული შტატების პრეზიდენტი დონალდ ტრამპი ვეტოს დაადებს სენატის მიერ მიღებული რეზოლუციას, რომელიც პრეზიდენტს ირანთან ომის წამოწყებას კონგრესის თანხმობის გარეშე უკრძალავს.
ტრამპის თქმით, პრეზიდენტის ძალაუფლების შეზღუდვა საშიში ნაბიჯია.
"თუ მე ხელებს შემიკრავენ, ირანს უფრო მეტი მანევრის საშუალება მიეცემა. ეს ძალიან ცუდი ნიშანია", - ციტირებს ტრამპის სიტყვებს რადიო "ამერიკის ხმა".
გამოცემის ვარაუდით, სენატი ვეღარ შეძლებს პრეზიდენტის ვეტოს დასაძლევად საჭირო ხმების მობილიზებას.
თეთრი სახლი აცხადებს, რომ ზემოთხსენებული რეზოლუციის გარდა, სხვა დამატებითი შემზღუდველი ზომები, რომლებიც წარმომადგენელთა პალატაში იქნა მიღებული და შესაძლოა სენატს გადაეცეს განსახილველად, პრეზიდენტისგან ვეტოს დაიმსახურებს.
შეერთებული შტატების სენატმა მხარი დაუჭირა რეზოლუციას, რომლითაც დონალდ ტრამპს ეზღუდება უფლებამოსილება, კონგრესის თანხმობის გარეშე ირანთან ომი წამოიწყოს.
რეზოლუციას მხარი 55-მა სენატორმა დაუჭირა, რომელთა შორის 45 დემოკრატი სენატორი იყო, ხოლო 8 ტრაპმის თანაპარტიელი რესპუბლიკელები.
კენჭისყრის დაწყემაბდე ტრამპმა მოუწოდა სენატს, რომ არ დაეჭირათ მხარი რეზოლუციისთვის.
მანამდე, შეერთებული შტატების კონგრესის წარმომადგენელთა პალატამ მიიღო რეზოლუცია, პრეზიდენტ დონალდ ტრამპის მიერ ირანთან ომის წამოწყების შესაძლებლობის შეზღუდვის განზრახვით.
რეზოლუციით პრეზიდენტ ტრამპის მიმართ მოწოდებულია, ირანის წინააღმდეგ შეიარაღებული ძალების გამოყენებმადე კონგრესისგან თანხმობა მიიღოს.
ამავე რეზოლუციით, გამონაკლის შემთხვევას ირანის მიერ შეერთებულ შტატებზე განხორციელებული პირდაპირი თავდასხმა წარმოადგენს.
წარმომადგენელთა პალატის მიერ მიღებული რეზოლუცია, სიმბოლურ ხასიათს ატარებს და კანონის ძალა არ აქვს, განსხვავებით სენატის მიერ მიღებული რეზოლუციისა.
შეერთებულ შტატებს და ირანს შორის დაძაბულობის ახალი ტალღა ირანის ისლამური რევოლუციის გუშაგთა კორპუსის ერთ-ერთი მეთაურის გენერალ ყასემ სულეიმანის მკვლელობას მოჰყვა.
ყასემ სულეიმანი 3 იანვარს ბაღდადში, აშშ-ის სარაკეტი იერიშის შედეგად მოკლეს.
საპასუხოდ, ირანმა 8 იანვარს, ერაყში მდებარე ორ ამერიკულ ბაზაზე სარაკეტო შეტევა განახორციელა.