ბრიტანეთის პრემიერ-მინისტრი ენდი ბერნემი ორშაბათს უკრაინის პრეზიდენტ ვოლოდიმირ ზელენსკის უმასპინძლებს. ამის შესახებ The Independent წერს.
გამოცემის ცნობით, ბერნემი ვიზიტის ფარგლებში გამოაცხადებს, რომ დიდი ბრიტანეთი უკრაინას Stone Cloak-ის რადიოელექტრონული ბრძოლის სისტემის ინტელექტუალური საკუთრების უფლებებს გადასცემს, რაც ამ სისტემის მასობრივი წარმოების დაწყების შესაძლებლობას შექმნის.
Stone Cloak - ტაბლეტის ზომის მოწყობილობაა, რომელიც რუსული დრონების აღმოჩენის სისტემების ჩასახშობად არის შექმნილი. ბრიტანეთის თავდაცვის სამინისტრომ უკრაინის შეიარაღებულ ძალებს უკვე რამდენიმე ათასი ასეთი სისტემა გადასცა.
გამოცემა აღნიშნავს, რომ ბრიტანეთში შექმნილმა ტექნოლოგიამ ფრონტის ხაზზე ეფექტიანობა უკვე დაამტკიცა. ასევე იგეგმება მისი ინტეგრირება დიდი ბრიტანეთის ახალი თაობის შორ მანძილზე მოქმედ შეიარაღებაში, მათ შორის Brakestop-ის პროექტში - შედარებით იაფ ფრთოსან რაკეტაში, რომლის მოქმედების რადიუსი მინიმუმ 600 კილომეტრია, ხოლო საბრძოლო ქობინის წონა 200–300 კილოგრამს შეადგენს.
გარდა ამისა, დაგეგმილია, რომ ორი ქვეყნის ლიდერი შეხვდება 200-ზე მეტ უკრაინელ სამხედრო მოსამსახურეს, რომლებმაც დიდ ბრიტანეთში Sea Breeze-ის პროგრამის ფარგლებში საბრძოლო მომზადება გაიარეს, რათა თავიანთი სამხედრო უნარები გაეუმჯობესებინათ.
ვიზიტის წინ, რომელიც ბერნემის პრემიერ-მინისტრად დანიშვნიდან ერთი კვირის შემდეგ გაიმართება, დიდი ბრიტანეთის ახალმა მთავრობის მეთაურმა განაცხადა, რომ ლონდონის მხარდაჭერა უკრაინის მიმართ „ურყევი რჩება“.
შეგახსენებთ, ლეიბორისტული პარტიის ახალმა ლიდერმა ენდი ბერნემმა 20 ივლისს ოფიციალურად შეცვალა კირ სტარმერი დიდი ბრიტანეთის პრემიერ-მინისტრის თანამდებობაზე.
მას შემდეგ, რაც მეფე ჩარლზ III-მ კირ სტარმერის გადადგომა ოფიციალურად მიიღო, ბერნემი ბუკინგემის სასახლეში მივიდა, სადაც მონარქმა ახალი მთავრობის ფორმირება დაავალა.
უკრაინის პრეზიდენტმა ვოლოდიმირ ზელენსკიმ ბერნემს პრემიერ-მინისტრის თანამდებობის დაკავება საჯაროდ მიულოცა. მან ასევე განაცხადა, რომ უკვე ჰქონდა პირველი სატელეფონო საუბარი დიდი ბრიტანეთის ახალ პრემიერ-მინისტრთან და აღნიშნა, რომ ისინი უახლოეს მომავალში პირადად შეხვდებიან.
