რუსეთთან ურთიერთობის საკითხებში პრემიერის სპეციალური წარმომადგენელი ზურაბ აბაშიძე არ ადასტურებს მედიის მიერ გავრცელებულ ინფორმაციას თბილისში რუსული კულტურის ცენტრის გახსნის შესახებ.
"ჩვენი ინფორმაციით, შვეიცარიის საელჩოში მდებარე რუსეთის ინტერესების დეპარტამენტში არანაირი რუსული ცენტრი არ გახსნილა. არც სხვაგან,"- ამბობს აბაშიძე ტაბულასთან საუბარში.
რუსული კულტურისა და მეცნიერების ცენტრის გახსნის შესახებ ინფორმაცია SOVA NEWS-მა გაავრცელა.
მანამდე 2019 წლის 29 ნოემბერს რუსეთის პარლამენტის ზედა პალატის წევრმა გრიგორი კარასინმა, რუსეთის საკითხებში საქართველოს პრემიერ-მინისტრის სპეციალურ წარმომადგენელთან, ზურაბ აბაშიძესთან შეხვედრის შემდეგ განაცხადა, რომ დეკემბრის შუა რიცხვებში თბილისში, რუსული ენისა და კულტურის ცენტრი გაიხსნებოდა.
