საპარლამენტო უმრავლესობის წევრი, მცხეთის მაჟორიტარი დეპუტატი დიმიტრი ხუნდაძე ეცდება დაარწმუნოს ბიძინა ივანიშვილი, რომ პროპორციული სისტემა ხიფათის შემცველია. ამის შესახებ მან ჟურნალისტებს განუცხადა "ქართული ოცნების"ცენტრალურ ოფისში სხდომის დაწყებამდე.
"მინდა, საკუთარი გუნდი დავარწმუნო და ვაჩვენო ის საფრთხეები, რაზეც ვსაუბრობთ და რაც მთავარია, დავარწმუნოთ პარტიის თავმჯდომარე, რომ ეს გადაწყვეტილება არის ხიფათის შემცველი და ქვეყნის შემდგომი პოლიტიკური ცხოვრება უნდა იყოს სტაბილური და არა რყევადი", - განაცხადა დიმიტრი ხუნდაძემ.
ამასთან, ხუნდაძემ დასძინა, რომ ის არ აპირებს პარტიის თავმჯდომარესთან დაპირისპირებას.
"მე არ ვაპირებ ბატონ ბიძინასთან დაპირისპირებას. მასთან მაქვს დიდი ხნის ნაცნობობა, ვიდრე პოლიტიკური ცხოვრების რამოდენიმე წელია. მე ვაპირებ დარწმუნებას, რომ საფრთხეები არის რეალური", - თქვა ხუნდაძემ.
"ქართულ ოცნების“ ცენტრალურ ოფისში საპარლამენტო უმრავლესობის შეხვედრა მიმდინარეობს, რომელსაც ბიძინა ივანიშვილი ხელმძღვანელობს.
შეხვედრის მთავარი თემა საკონსტიტუციო ცვლილებები იქნება პროპორციულ სისტემაზე გადასვლასთან დაკავშირებით.
აღნიშნული საკონსტიტუციო ცვლილებები პარლამენტის გუშინდელ სხდომაზე ჩავარდა. მაჟორიტარების ნაწილი აპროტესტებს პროპორციულ სისტემაზე გადასვლას.