ირანის საგარეო მინისტრი მოჰამედ ჯავად ზარიფი საფრანგეთის ქალაქ ბიარიცს ეწვია, სადაც დიდი შვიდეულის სამიტის ფარგლებში მსოფლიოს ლიდერები არიან შეკრებილები.
გავრცელებული ინფორმაციით, ზარიფი ბიარიცში თავის ფრანგ კოლეგას, ჟან ივ ლე დრიანთან გამართავს მოლაპარაკებებს.
ირანის საგარეო საქმეთა მინისტრის ბიარიცში ვიზიტმა უმალ გააჩინა შეკითხვები, შეხვდება თუ არა ის შეერთებული შტატების პრეზიდენტს, დონალდ ტრამპს ან მისი ადმინისტრაციის რომელიმე წარმომადგენელს.
ეჭვები ჯავად ზარიფის პრესმდივანმა გაფანტა, რომელმაც განაცხადა, რომ ამ ვიზიტის ფარგლებში ირანის მთავარი დიპლომატი არ გამართავს მოლაპარაკებებს შტატების წარმომადგენლებთან.
თეირანსა და ვაშინგტონს შორის დაძაბულობა მას შემდეგ გამწვავდა, რაც დონალდ ტრამპის ინიციატივით, აშშ-ი ირანის ბირთვული შეთანხმებიდან გამოვიდა.
ამის შემდეგ ტრამპის ადმინისტრაციამ გაამკაცრა სანქციები ირანის ხელისუფლების უმაღლესი პირების, მათ შორის უზენაესი ლიდერის, აიათოლა ალი ხამენეის მიმართ.
საფრანგეთის გადაწყვეტილებამ, ბიარიცში ირანის საგარეო საქმეთა მინისტრის მოწვევის შესახებ, კიდევ უფრო მეტად მკაფიოდ წარმოაჩინა ემანუელ მაკრონის სურვილი, წამყვანი როლი ითამაშოს შტატებსა და ირანს შორის დაძაბულობის შემცირებაში.
ტრამპი განსაკუთრებული ენთუზიაზმით არ ეკიდება მაკრონის ინიციატივებს და ამას აშშ-ის შიდა საქმეებში ჩარევად მიიჩნევს.
