17 ოქტომბერს, 9:00 საათზე, საქართველოს ტექნიკურ უნივერსიტეტში გაიხსნება საქართველოს ტექნიკური უნივერსიტეტისა და ფოჯას უნივერსიტეტის (იტალია) პირველი ერთობლივი საერთაშორისო კონფერენცია “მრეწველობის დარგების დინამიკა და თანამედროვე ტენდენციები საქართველოსა და ევროკავშირში: საინფორმაციო-საკომუნიკაციო ტექნოლოგიები მიწოდების ჯაჭვის მენეჯმენტში“.
კონფერენციის გახსნას დაესწრება საქართველოში იტალიის საგანგებო და სრულუფლებიანი ელჩი ანტონიო ენრიკო ბარტოლი.
ღონისძიებას საქართველოს ტექნიკური უნივერსიტეტის რექტორი არჩილ ფრანგიშვილი გახსნის. მისასალმებელი სიტყვით გამოვლენ იტალიის ელჩი ენრიკო ბარტოლი, რექტორის მოადგილე მეცნიერების დარგში ზურაბ გასიტაშვილი, საერთაშორისო ურთიერთობათა და სტანდარტების სამსახურის უფროსი ოთარ ზუმბურიძე, ერთობლივი საორგანიზაციო კომიტეტის ორგანიზატორი ნინო ადამაშვილი და სხვები.
კონფერენციის თემატიკა მოიცავს არა მარტო ტექნიკურ მიმართულებებს, არამედ მენეჯმენტის, ეკონომიკისა და ბიზნესის სფეროებს. კონფერენციის მიზანია, თავი მოუყაროს მკვლევრებს, მეცნიერებს, პრაქტიკანტებსა და სტუდენტებს სამეცნიერო დისკუსიაში, რომელიც შეეხება ბიზნესსაქმიანობაში ტექნოლოგიების უფრო აქტიურად გამოყენებასთან დაკავშირებულ მიმდინარე და ახლად წარმოქმნილ კვლევით საკითხებს, პრობლემებს, შეკითხვებს, მიგნებებს, მიღწევებსა და ახალ პერსპექტივებს. კონფერენცია, აგრეთვე, უმასპინძლებს დისკუსიებს, მონაცემთა ანალიზს, ქეისების შესწავლასა და ინდუსტრიულ პრაქტიკებს – წარმოდგენილს კვლევითი ნაშრომების სახით. კონფერენცია იქნება შესანიშნავი შესაძლებლობა, მონაცემებისა და გამოცდილებების გასაზიარებლად, მსოფლიოს სხვადასხვა კუთხის მკვლევართა პირისპირ შესახვედრად, საერთაშორისო აკადემიური კვლევების ხელშესაწყობად, დისკუსიების გამართვისა და იდეების გაცვლისთვის, ცოდნისა და შედეგების თეორიულად გაზიარებისთვის, საერთაშორისო ჟურნალებში მეცნიერების ნაშრომთა პოპულარიზაციისთვის და მეცნიერთა ინტეგრაციისთვის მსოფლიო პროცესებში, ასევე, მომავალი კოლაბორაციისთვის საერთაშორისო პარტნიორების მოსაძიებლად.
საერთაშორისო კონფერენციაში მონაწილეობენ პროფესორ-მასწავლებლები, მკვლევრები, სტუდენტები, პრაქტიკული გამოცდილების მქონე სპეციალისტები საქართველოდან, იტალიიდან, პორტუგალიიდან, რუმინეთიდან, პოლონეთიდან, თურქეთიდან და სხვ.
საქართველოს ტექნიკური და ფოჯას უნივერსიტეტები უკვე წელიწადზე მეტია თანამშრომლობენ. განხორციელებული აქვთ არაერთი ერთობლივი პროექტი. აღნიშნული კონფერენცია მნიშვნელოვნად განამტკიცებს ორი უნივერსიტეტისა და ქვეყნის ურთიერთობას.
კონფერენცია 19 ოქტომბერს დასრულდება.
