აზერბაიჯანელი ჟურნალისტის, აფგან მუხთარლის ადვოკატებმა 19 ივლისს ევროსასამართლოში განაცხადი შეიტანეს. ამის შესახებ ინფორმაციას „ნეტგაზეთი“ მუხთარლის ადვოკატ არჩილ ჩოფიკაშვილზე დაყრდნობით ავრცელებს.
“ჩვენ ევროპის სასამართლოს მივმართეთ 2 ივნისს, ვაცნობეთ აფგან მუხთარლის საქმესთან დაკავშირებით, რომ მის მიმართ ადგილი ჰქონდა კონვენციით გარანტირებული უფლებების დარღვევას და მოვითხოვეთ დროებითი ღონისძიება, რამაც საშუალება მოგვცა, რომ მინიმალური სამედიცინო სერვისით ესარგებლა აფგან მუხთარლის იმ ეტაპზე. გუშინ, უკვე 19 ივლისს, ჩვენ წარვადგინეთ ძირითადი განაცხადი, პრიორიტეტი მიანიჭეს ამ საქმეს. ჩვენ ვითხოვთ, რომ ევროსასამართლომ დაადგინოს ძირითადი უფლებების დარღვევის ფაქტი, რომლის გამოც აფგან მუხთარლის დაერღვა ევროკონვენციით გარანტირებული უფლებები. ეს არის დაახლოებით 14 მუხლი ევროკონვენციით და დამატებით ოქმებით გარანტირებული.
მოპასუხე არის ორივე სახელმწიფო, როგორც აზერბაიჯანი, ისე საქართველო, და ისინი სოლიდარულად აგებენ პასუხს ამ დარღვევებზე. დაცვის მხარე სცენარის საუკეთესო განვითარებად ევროსასამართლოს მიერ მიღებულ იმ გადაწყვეტილებას მიიჩნევს, რომლის თანახმადაც აზერბაიჯანის ხელისუფლებას აფგან მუხთარლის პატიმრობიდან გათავისუფლება დაევალება”, - ამბობს ჩოფიკაშვილი “ნეტგაზეთთან” საუბრისას.