10 დეკემბერს ადამიანის უფლებათა საყოველთაო დეკლარაციის ხელმოწერიდან 65-ე წლისთავი სრულდება. დეკლარაციამ საფუძველი ჩაუყარა გლობალურ ძალისხმევას ადამიანის უფლებათა დაცვისკენ მიმართული საერთაშორისო ყოვლისმომცველი სამართლებრივი და ინსტიტუციური ჩარჩოს განვითარებისათვის. მიმდინარე წელს ასევე აღინიშნება ადამიანის უფლებათა ევროპული კონვენციის ძალაში შესვლის მე-60, ვენის დეკლარაციისა და სამოქმედო გეგმის მე-20, და გაეროს გენერალური ასამბლეის მიერ მიღებული ადამიანის უფლებათა დამცველების დეკლარაციის მე-15 წლისთავი.
ადამიანის უფლებათა საერთაშორისო დღესთან დაკავშირებით, 2013 წლის 10 დეკემბერს ევროკავშირის წარმომადგენლობა და ევროპის საბჭოს ოფისი საქართველოში, შვედეთის, ამერიკის შეერთებული შტატების, ნიდერლანდების და დიდი ბრიტანეთისა და ჩრდილოეთ ირლანდიის გაერთიანებული სამეფოს საელჩოები, გაეროს ადამიანის უფლებათა უმაღლესი კომისრის ოფისი საქართველოში და ევრაზიის თანამშრომლობის ფონდი აწყობს ღონისძიებას და საზეიმო მიღებას ზურაბ წერეთლის თანამედროვე ხელოვნების მუზეუმში (რუსთაველის გამზირი 27) 17:00 საათიდან 19:00 საათამდე. ღონისძიების მიზანია საქართველოში მცხოვრები უმცირესობათა სხვადასხვა ჯგუფის წინაშე მდგომი საჭირბოროტო საკითხების გაშუქება და საქართველოს ეთნიკური, რელიგიური და სხვ. მრავალფეროვნების ასახვა.
ღონისძიებას დაესწრებიან და დამსწრეთ მიესალმებიან საქართველოს სახალხო დამცველი, ბ-ნი უჩა ნანუაშვილი, საქართველოს იუსტიციის მინისტრის მოადგილე, ბ-ნი გოჩა ლორთქიფანიძე, და საქართველოში მოქმედი სხვადასხვა დიპლომატიური მისიის ხელმძღვანელები. ღონისძიებას უმასპინძლებს დისკრიმინაციის წინააღმდეგ და უმცირესობების უფლებების დაცვაზე მომუშავე ადგილობრივი არასამთავრობო ორგანიზაციები და ადამიანის უფლებათა დამცველები. ამასთანავე, დამსწრეებს ექნებათ უნიკალური შესაძლებლობა უმცირესობების ჯგუფების და/ან მონაწილე არასამთავრობო ორგანიზაციების წარმომადგენლებისგან მოისმინონ მათი პირადი ისტორიები თუ რა გამოწვევების წინაშე დგანან საქართველოში მაცხოვრებელი უმცირესობათა ჯგუფები.
ღონისძიება გაიმართება 2013 წლის 10 დეკემბერს ზურაბ წერეთლის თანამედროვე ხელოვნების მუზეუმში (მისამართი: რუსთაველის გამზირი 27) 17:00 საათიდან 19:00 საათამდე.