დღეს, 10 დეკემბერს, ადამიანის უფლებათა დაცვის საერთაშორისო დღეს, თბილისის ადამიანის უფლებათა სახლის წარმომადგენლები რკინიგზის ყოფილ საავადმყოფოში შესახლებულ უსახლკარო ოჯახებს მოინახულებენ.
უსახლკარო მოქალაქეებს ადგილზე იურიდიულ კონსულტაციებს გაუწევენ თბილისის ადამიანის უფლებათა სახლის წევრი ორგანიზაციის, „კონსტიტუციის 42-ე მუხლის" იურისტები.
ყოფილი რკინიგზის საავადმყოფოს ჭერქვეშ 55-მდე უსახლკარო ოჯახი ცხოვრობს. მათი დიდი ნაწილი საზოგადოების მოწყვლადი ფენების წარმომადგენლები არიან: შშმ პირები, მრავალშვილიანი ან მარტოხელა დედები, დევნილები და ა.შ.
თბილისის ადამიანის უფლებათა სახლმა უსახლკარო მოქალაქეებისთვის მოამზადა საინფორმაციო მეგზური - „უსახლკარო პირთა თავშესაფრით უზრუნველყოფის პროცედურები", რომელიც ბენეფიციარებს ადგილზე დაურიგდებათ.
პროექტს - „უფასო იურიდიული დახმარება საქართველოს ღარიბი მოქალაქეებისთვის" ახორციელებს თბილისის ადამიანის უფლებათა სახლის წევრი ორგანიზაციები - „კონსტიტუციის 42-ე მუხლი" და ადამიანის უფლებათა ცენტრი.
პროექტის მიმდინარეობისას გამოიკვეთა, რომ თავშესაფრის არქონა და მიუსაფრობა ერთ-ერთი ყველაზე მწვავე პრობლემაა, რაც დღეისათვის სოციალურად დაუცველ, ღარიბ მოქალაქეებს აწუხებთ. ცალსახად გამოკვეთილია საჭიროება, სახელმწიფო ბიუჯეტში გათვალისწინებული იყოს თანხები ქვეყანაში თავშესაფრების მოსაწყობად ან ასაშენებლად.