ნიუ ჰოსპიტალი "საერთაშორისო გამჭვირვალობა-საქართველოს" პასუხობს, რომელსაც გთავაზობთ უცვლელად: "საერთაშორისო გამჭვირვალობა-საქართველოს მიერ 2013 წლის 6 დეკემბერს გამოქვეყნებულ ანგარიშში „გამარტივებული სახელმწიფო შესყიდვები - კორუფციის რისკები" მითითებულია 38-ე გვერდზე, რომ კახაბერ ოქრიაშვილის კუთვნილმა კომპანიებმა: შპს „პსპ ფარმამ", შპს „ნიუ ჰოსპიტალსმა" და შპს „სუფთა სამყარო აჭარაში" დადეს 142 არაკონკურენტული კონტრაქტი მთლიანი ღირებულებით 4.94 მილიონი ლარი.
პასუხად ვაცხადებთ, რომ:
1. შპს „სუფთა სამყარო აჭარაში"-ს არსებობის შესახებ, რომელმაც ანგარიშში გავრცელებული ინფორმაციით 1,12 მილიონი ლარის 13 კონტრაქტი გააფორმა, პირველად ამ ანგარიშიდან გავიგეთ და ბ-ნ კახაბერ ოქრიაშვილს არანაირი კავშირი ამ კომპანიასთან არ ჰქონია და არ აქვს.
2. შპს ნიუ ჰოსპიტალსს ანგარიშში მითითებულ პერიოდში გააჩნდა პირდაპირი შესყიდვით წესით საკონტრაქტო ურთიერთობა შემდეგ უწყებებთან:
- სამხარაულის სახელობის სასამართლო ექსპერტიზასთან, როგორც ეროვნული ოფთალმოლოგიური ცენტრის სამართალმემკვიდრეს და ისტორიულად კვალიფიციურ ექსპერტულ ორგანიზაციას ოფთალმოლოგიის დარგში ქვეყანაში.
- როგორც ორი ინსტიტუტის: ოფთალმოლოგიის ეროვნული ცენტრის და ნევროლოგიისა და ნეიროქირურგიის ეროვნული ცენტრის სამართალმემკვიდრეს საქართველოს თავდაცვის სამინისტროსთან, საქართველოს სასჯელაღსრულების სამინისტროსთან და აჭარის ავტონომიური რესპუბლიკის ჯანდაცვის სამინისტროსთან.
ყველა ჩამოთვლილი კონტრაქტის ინიციატორები იყვნენ თავად აღნიშნული უწყებები, რადგან მსგავსი სპეციალიზებული სამედიცინო მომსახურების გაწევა მხოლოდ ნიუ ჰოსპიტალსში იყო შესაძლებელი.
ყველა ეს მომსახურება გაწეული იქნა ნიუ ჰოსპიტალსის სტანდარტული კონკურენტული ფასებით, როგორც სხვა ნებისმიერი მომხმარებლისათვის.
3. ანგარიშში მითითებული 2,39 მილიონი ლარის სახელმწიფო შესყიდვები შპს „პსპ ფარმას" წლიური ბრუნვის 0,2 პროცენტს შეადგენს. ეს პროცენტი ნამდვილად არ ქმნის ამინდს პსპ ფარმას შემოსავლებში. ყველა შესყიდვა განხორციელებულია კონკურენტულ საბაზრო ფასებში სახელმწიფო შესყიდვების შესახებ კანონმდებლობის ფარგლებში".