საქართველოს მწერალთა კავშირმა „საქართველოს სახალხო პოეტისა" და „საქართველოს სახალხო მწერლის" საპატიო წოდებები აღადგინა. მწერალთა კავშირის თავმჯდომარის, მაყვალა გონაშვილის თქმით, „სახალხო პოეტის" საპატიო წოდება ბოლოს, 1957 წელს გალაკტიონ ტაბიძემ მიიღო.
„57-წლიანი პაუზის შემდეგ, მწერალთა კავშირის გამგეობამ „სახალხო პოეტისა" და „სახალხო მწერლის" საპატიო წოდებები აღადგინა. გამგეობის ერთსულოვანი გადაწყვეტილებით, აღდგენილი წოდებები პოეტ ჯანსუღ ჩარკვიანსა და მწერალ ჭაბუა ამირეჯიბს მიენიჭათ," - აცხადებს მაყვალა გონაშვილიც.
მისივე თქმით, ჯანსუღ ჩარკვიანისა და ჭაბუა ამირეჯიბის საპატიო წოდებებით დაჯილოდოება 2014 წლის დასაწყისში, საობაოდ გაიმართება.
„მთელი ჩემი ცხოვერბა ჩემს ხალხთან ვიყავი და ვარ. ჩემი პოეზია ხალხს ეუთვნის... ყველას თავისი სიცოცხლის წიგნი აქვს, ჩემი წიგნი ხალხის მიერაა შექმნილი. მე სიჩუმით არასოდეს მიხმაურია. მთელი ჩემი სიცოცხლე ჩემს ხალხთან ერთად ვხმაურობდი და ვიბრძოდი ჩემი ხალხის თავისუფლებისათვის!
რაც მთავარია, ვიარე სიყვარულის გზით, რამეთუ კარგად ვიცი: ღმერთი სიყვარულია!
გამოვტყდები და ვიტყვი: ჩემთვის სახალხოობა მოულოდნელი იყო, მაგრამ ერთს მაინც მოგახსენებთ ხმამაღლა: უღრმესი მადლობა მწერალთა კავშირს და მის ხელმძღვანელობას, რომლებმაც აღადგინეს ეს ეროვნული უფლება-მოსილება.
მე, რუსთაველის პრემიის ლაურეატი ჯანსუღ ჩარკვიანი პირობას ვდებ: კვლავ სახალხოდ ვემსახურო ჩემს ქართველ ხალხს!
ისიც მინდა ვთქვა, რომ მთელი ცხოვრება ჭაბუა ამირეჯიბის გვერდით ვიყავი. მიხარია, რომ ამ ძვირფას კაცთან ერთად, სახალხოდ მაღიარეს," - აცხადებს პოეტი ჯანსუღ ჩარკვიანი.
„სახალხო მწერლის" საპატიო წოდების მინიჭებისთვის ჭაბუა ამირეჯიბი საქართველოს მწერალთა კავშირს მადლობა უხდის და ამბობს, რომ ეს წოდება ყველა სხვა რეგალიაზე მაღალია.