30 ნოემბერს, ქალაქ ბათუმში სასტუმრო „შერატონში" გაიმართება კონფერენცია, თემაზე "გულის უკმარისობის ევროპის კარდიოლოგთა საზოგადოების 2012 წლის გაიდლაინი", რომელიც ტარდება ფარმაცევტული კომპანია „ბერლინხემის" ეგიდით (BERLIN-CHEMIE/MENARINI) და საქართველოში ყველაზე მსხვილი ჰოსპიტალური ქსელის „ჩემი ოჯახის კლინიკის" ორგანიზებით.
კონფერენციას დაესწრებიან დასავლეთ საქართველოს „ჩემი ოჯახის კლინიკის" ქსელის სამედიცინო პერსონალი. კერძოდ, სამეგრელოს, აჭარის და იმერეთის რეგიონებში არსებული ქსელის სამედიცინო ცენტრის წამყვანი სპეციალისტები, მიმართულების ხელმძღვანელები და კლინიკის დირექტორები.
აღნიშნული კონფერენცია ერთ-ერთია იმ რამდენიმე მნიშვნელოვანი ღონისძიებიდან, რომელიც კომპანია „ბერლინხემმა" ევროპის კარდიოლოგთა ასოციაციის გაიდლაინების საქართველოში გავრცელებასა და დანერგვას მიუძღვნა. ამ ციკლს ეკუთვნოდა 18-19 ოქტომბერს თბილისში ჩატარებული მასტერ კურსიც, რომელიც ევროპის კარდიოლოგთა ასოციაციის პრეზიდენტისა და ხუთი ევროპელი სპიკერის მონაწილეობით ჩატარდა.
30 ნოემბრის კონფერენციაზე მოხდება დეტალური განხილავა გულის ქრონიკული უკმარისობის ასპექტების და მართვის ძირითადი პრინციპების.
კონფერენციის დახურვის შემდეგ მონაწილეები დაათვალიერებენ ბათუმში "ჩემი ოჯახის კლინიკის" ქსელში არსებულ ბათუმის რეფერალურ საავადმყოფოს ახლადგახსნილ კარდიოლოგიისა და კარდიოქირურგიის განყოფილებას. ამ მიმართულებით „ჩემი ოჯახის კლინიკამ" დიდი ინვესტიციები განახორციელა. კომპანიის მენეჯმენტმა უზრუნველყო თანამედროვე მტკიცებულებებზე და საერთაშორისო სტანდარტებზე დამყარებული განყოფილების ჩამოყალიბება აჭარის რეგიონში, თუმცა ამ სერვისით მომსახურებას როგორც აჭარის, ასევე გურიის მოსახლეობაც შეძლებს.