თბილისის მერიის ინიციატივით, 2013 წელს თბილისში რეგისტირებული თითოეული აბონენტი 100 ლარიანი კომუნალური ვაუჩერით სარგებლობს. აღნიშნული ინიციატივის ფარგლებში, იანვარში, თებერვალსა და მარტში თითოეულ ოჯახს სააბონენტო ანგარიშზე 20-20 ლარი უკვე დაერიცხა. ამ თანხიდან 8 ლარი და 45 თეთრი ელექტროენერგიის, 8 ლარი და 40 თეთრი დასუფთავების, ხოლო 3 ლარი და 15 თეთრი წყლის გადასახადებზე გადანაწილდა. კომუნალური ვაუჩერით სარგებლობენ თბილისში მცხოვრები ის სოციალურად დაუცველი ოჯახები, რომელთა სარეიტინგო ქულა 70 000 არ აღემატება. თითოეულ მათგანს კომუნალური გადასახადების დასაფარად სააბონენტო ანგარიშზე 100 ლარი და პირად ანგარიშზე დამატებით 150 ლარი დაერიცხათ. ქალაქის მასშტაბით, კომუნალური ვაუჩერის დარჩენილი ორ თვის - ნოემბრისა და დეკემბრის დარიცხვა მიმდინარე თვეში განახლდა და თბილისელები კომუნალურ გადასახადებს კვლავ 20 ლარით ნაკლებს გადაიხდიან.
კომუნალური ვაუჩერის პროექტის განხორციელება დაგეგმილია 2014 წელსაც. მომავალი წლის თბილისის ბიუჯეტის პროექტში ამისთვის გარკვეული თანხაა გამოყოფილი და ბიუჯეტის დამტკიცების შემთხვევაში, თბილისელებს კვლავ ექნებათ შესაძლებლობა ამ შეღავათით ისარგებლონ.
თბილისის მერი გიგი უგულავა დღეს, გლდანში მცხოვრებ მამფორიების ოჯახს ესტუმრა და კომუნალური ვაუჩერის შესახებ გაესაუბრა.
