მთავარი ჯილდოს გარდა, სააგენტომ გაიმარჯვება კიდევ სამ ნომინაციაში მოიპოვა: ყველაზე წარმატებული ინფრასტრუქტურული გადაწყვეტილება, საუკეთესო IT მენეჯმენტი და ინფორმაციული უსაფრთხოების საუკეთესო მენეჯმენტი.
როგორც საჯარო რეესტრის ეროვნული სააგენტოს თავმჯდომარემ პაპუნა უგრეხელიძემ აღნიშნა: „ჩვენთვის საამაყოა, რომ საჯარო რეესტრი „წლის საუკეთესო IT სააგენტოდ" დასახელდა. ამით კიდევ ერთხელ გაესვა ხაზი, რომ სააგენტო არის განვითარებაზე ორიენტირებული ორგანიზაცია. ბოლო წლებში საჯარო რეესტრის IT გუნდმა არაერთი მნიშვნელოვანი პროექტი განახორციელა ელექტრონული მმართველობის გაუმჯობესების კუთხით. შესაბამისად, ჩვენთვის უმნიშვნელოვანესია მსგავს კონკურსებში მონაწილეობა და მითუმეტეს გამარჯვება. ჩვენ არ ვჩერდებით და მომავალშიც კიდევ ბევრ მნიშვნელოვან და საჭირო პროეტს შევთავაზებთ მომხმარებელს".
მონაცემთა გაცვლის სააგენტოსა და ICT ბიზნეს საბჭოს მიერ ორგანიზებულ ღონისძიებაში წარდენილი იყო როგორც ბიზნეს, ასევე საჯარო სექტორში განხორციელებული 50-მდე IT პროექტი, რომელიც 14 ნომინაციაში გადანაწილდა.
საჯარო რეესტრის გარდა, ჯილდო იუსტიციის სამინისტროს კიდევ ერთმა სსიპ-მა - სერვისების განვითარების სააგენტომაც მიიღო, რომელმაც გამარჯვება ორ ნომინაციაში მოიპოვა: „ყველაზე ფართოდ გამოყენებადი ელექტრონული სერვისი" და „საუკეთესო სამომავლო IT პროექტი".
საჯარო სექტორიდან კიდევ ორ ნომინაციაში „ყველაზე წარმატებული IT ინოვაცია გამოხატული ბიზნეს პროცესის გამარტივებაში" და „საუკეთესო ონლაინ საინფორმაციო წყარო", გამარჯვებული საქართველოს შრომის, ჯანმრთელობისა და სოციალური დაცვის სამინისტრო გახდა.
ბიზნეს სექტორიდან გამარჯვება შემდეგმა კომპანიებმა მოიპოვეს:
1. საუკეთესო სისტემური ინტეგრატორი: კომპანია UGT;
2. საუკეთესო კომპლექსური ბიზნეს გადაწყვეტილება: საქართველოს ბანკი;
3. წლის პროგრამული უზრუნველყოფა: Technology and Science Dynamics Inc;
4. საუკეთესო IT გადაწყვეტა ბიზნესისათვის: საქართველოს ბანკი;
5. IT განათლების საუკეთესო პროვაიდერი: Instigate CJSC;
6. ინფორმაციული / კიბერ უსაფრთხოების საუკეთესო გადაწყვეტილება: კომპანია"აზრი";
7. საუკეთესო მულტიმედიური პროექტი: Technology and Science Dynamics Inc;
წლევანდელი კონფერენცია, რომლის დევიზია „ინფორმაციული ტექნოლოგიები მომავლისთვის", მონაწილეობას მსოფლიოს 20-ზე მეტი ქვეყნის 400-მდე წარმომადგენელი ესწრებოდა. კონფერენციის მონაწილეებმა განიხილეს კიბერ უსაფრთხოებისა და ინფორმაციული ტექნოლოგიების განვითარების საკითხები, წარმოადგინეს წლის განმავლობაში შემუშავებულ ინოვაციური IT პროექტები და გაეცნენ აღნიშნული მიმართულებით სხვადასხვა ქვეყნის მიერ მიღწეულ წარმატებებს.

კონფერენციაზე ყურადღება დაეთმობა როგორც საქართველოში, ისე რეგიონში ელექტორნული მმართველობის განვითარების პროექტებს, ასევე ამ პროექტებში ტექნოლოგიური ინოვაციების დანერგვის პროცესს.

გასულ წელებში ანალოგიურ კონკურსში არაერთი გამარჯვებული გამოვლინდა: 2012 წელს გრან-პრის მფლობელი გახდა საქართველოს შრომის, ჯანმრთელობისა და სოციალური დაცვის სამინისტრო. 2011 წელს გრან-პრის მფლობელი საქართველოს იუსტიციის სამინისტროს სსიპ სამოქალაქო რეესტრის სააგენტო იყო, 2010 და 2008 წლებში კი - საქართველოს იუსტიციის სამინისტროს საჯარო რეესტრის ეროვნული სააგენტო, ხოლო 2009 წელს - საქართველოს ფინანსთა სამინისტრო.

GITI 2013 ევროკავშირის ელ-მმართველობის განვითარების პროექტისა და სპონსორების HP, Microsoft, Cisco, SAP, UGT, Orient Logic მხარდაჭერით განხორციელდა.