თბილისის საკრებულოში სხდომა გაიმართა, რომლზეც დეპუტატებმა 5 საკითხი განიხილეს.
საკანონმდებლო ორგანოს წარმომადგენლებმა სხვა საკითხებთან ერთად რამდენიმე ქუჩისთვის სახელების მინიჭების თაობაზე იმსჯელეს.
საკითხი სხდომაზე განსახილველად სახელდებისა და სიმბოლიკის კომისიის თავმჯდომარემ ნათელა მაჭავარიანმა წარმოადგინა.
საკრებულოს წევრების გადაწყვეტილებით, თბილისში, ისნის რაიონში, ნიაბის ქუჩის მიმდებარედ არსებულ უსახელო ქუჩას აბულის სახელი მიენიჭა.
როგორც ნათელა მაჭავარიანმა განმარტა, აღნიშნული ქუჩისთვის სახელის მინიჭების ინიციატივით, საკრებულოს სასულიერო პირებმა მიმართეს.
"ელიას მთაზე მიმდინარეობს წმ. დიდმოწამე ქეთევან დედოფლის სახელობის სამონასტრო კომპლექსის მშენებლობა. სასულიერო პირებმა მოგვმართეს ინიციატივით, ქუჩას, რომელზეც კომპლექსი მდებარეობს, დაერქვას ჯავახეთში მდებარე აბულის მთის სახელი, სადაც ისტორიული აბულის ციხეა აგებული და წმ. ნინოს სახელობის დედათათა მონასტრის სამონასტრო კომპლექსი მდებარეობს",- განაცხადა ნათელა მაჭავარიანმა.
დღესვე დეპუტატებმა ნაძალადევის რაიონში, დავით გურამიშვილის გამზირის გაგრძელებისა და დიდუბის რაიონში, მიხეილ ჭიაურელის ქუჩასთან არსებული გასასვლელისთვის, მიხეილ ჭიაურელის სახელის მინიჭების შესახებაც იმსჯელეს.
