სამედიცინო სპეციალობის კურსდამთავრებულები კვალიფიკაციას ბახჩეშეჰირის უნივერსიტეტში აიმაღლებენ. აღნიშნულის შესახებ მომავალ რეზიდენტებს აჭარის ა/რ ჯანმრთელობისა და სოციალური დაცვის მინისტრმა ნუგზარ სურმანიძემ, თურქეთ-საქართველოს განათლებისა და კულტურის ფონდის მმართველი საბჭოს წევრმა ისმეთ დინდარმა და ბახჩეშეჰირის უნივერსიტეტის წარმომადგენლებმა სამინისტროში გამართულ დღევანდელ შეხვედრაზე ამცნეს.
საგანმანათლებლო პროგრამის ფარგლებში რეზიდენტთა 7 კაციანი ჯგუფი თურქეთში 2014 წლის დასაწყისში გაემგზავრება. ახალგაზრდები კვალიფიკაციას აჭარის ჯანდაცვის სამინისტროსა და ბეხჩეშეჰირის უნივერსიტეტს შორის გაფორმებული მემორანდუმის ფარგლებში აიმაღლებენ.
აჭარის მთავრობისა და ბახჩეშეჰირის უნივერსიტეტს შორის თანამშრომლობა 2013 წლის აგვისტოში დაიწყო, როცა აჭარის ავტონომიური რესპუბლიკის მთავრობის თავმჯდომარე არჩილ ხაბაძე მინისტრთა კაბინეტის წევრებთან ერთად ოფიციალური ვიზიტით სტამბოლში იმყოფებოდა. ამის შემდეგ საპასუხო ვიზიტით აჭარას უნივერსიტეტის რექტორი ენვერ იუჯელიც სტუმრობდა.
ბახჩიშეჰერის უნივერსიტეტი ქ. სტამბოლში მდებარეობს. საგანმანათლებლო დაწესებულების ფილიალები ფუნქციონირებს 10 სხვადასხვა ქვეყანაში. უნივერსიტეტის სტუდენტები ჩართული არიან მსოფლიოს სხვადასხვა სასწავლებლებთან გაცვლით პროგრამებში.
