ეკონომიკისა და მდგრადი განვითარების სამინისტროს ერთ დროს კახი კალაძის საკუთრებაში მყოფი „კალა კაპიტალის" შვილობილი „არსენალ დეველოპმენტისათვის" ჯარიმები და საურავები არ უპატიებია. სამინისტროს ინფორმაციით, ამ ეტაპზე, პროექტთან დაკავშირებით ინვესტორთან მიმდინარეობს მოლაპარაკებები. „შესაბამისად, სამინისტროს მიერ არ ყოფილა მიღებული არანაირი გადაწყვეტილება ჯარიმებისა თუ პირგასამტეხლოების პატიების თაობაზე"- აცხადებენ გიორგი კვირიკაშვილის უწყებაში.
როგორც სამინისტროს მიერ მოწოდებულ ინფორმაციაში აღნიშნული, 2007 წლის 9 ოქტომბრის საქართველოს ეკონომიკური განვითარების მინისტრის №1-1/1541 ბრძანების, 2008 წლის 14 თებერვლის აუქციონში გამარჯვების დამადასტურებელი №22ა ოქმისა და 2008 წლის 27 ივნისის შპს „არსენალ დეველოპმენტსა" და საქართველოს ეკონომიკური განვითარების სამინისტროს შორის გაფორმებული დამატებითი წერილობითი ხელშეკრულების საფუძველზე, შპს „არსენალ დეველოპმენტს" 38 მლნ 20 ათას აშშ დოლარად გადაეცა ქ. თბილისში, გედევანიშვილის ქუჩაზე №17-ში (ყოფილი არსენალი) მდებარე შენობა-ნაგებობები და მათზე დამაგრებული 772 958 კვ.მ. მიწის ნაკვეთი. აღნიშნულ მიწის ნაკვეთზე მყიდველს 9 წლის განმავლობაში 700 მილიონი აშშ დოლარის ოდენობის ინვესტიცია უნდა განეხორციელებინა.
ეკონომიკისა და მდგრადი განვითარების ინფორმაციითვე, 2008 წლის 15 აპრილისთვის შპს „არსენალ დეველოპმენტმა" ორ ტრანშად გადაიხადა საპრივატიზებო თანხის ნაწილი 19 მლნ 10 ათას 500 აშშ დოლარი ექვივალენტი ლარებში.ხოლო თანხის დარჩენილი ნაწილი მის მიერ არ არის გადახდილი.
„ამასთან, ამ ეტაპზე, პროექტთან დაკავშირებით ინვესტორთან მიმდინარეობს მოლაპარაკებები. შესაბამისად, სამინისტროს მიერ არ ყოფილა მიღებული არანაირი გადაწყვეტილება ჯარიმებისა თუ პირგასამტეხლოების პატიების თაობაზე"- ნათქვამია ეკონომიკისა და მდგრადი განვითარების სამინისტროს მიერ მოწოდებულ ინფორმაციაში.
