აჭარაში ინვესტიციების მოცულობა 26%-ით გაიზარდა. აჭარის ფინანსთა და ეკონომიკის სამინისტროს ინფორმაციით, 2013 წელის 9 თვეში რეგიონში განხორციელებული ინვესტიციების მოცულობამ 123,6 მლნ დოლარი შეადგინა, მაშინ როდესაც 2012 წლის 9 თვეში რეგიონში 98 მლნ დოლარის ინვესტიცია განხორციელდა. სამინისტროში განმარტავენ, რომ მიმდინარე წლის 9 თვეში რეგიონში განხორციელებული ინვესტიციებიდან ყველაზე მეტი, 45 %-ი მშენებლობის სექტორზე მოდის, ინვესტიციების 41 %-ი კი ტურიზმზე. რაც შეეხება მრეწველობის დარგს, მასზე 9 თვეში აჭარაში განხორციელებული ინვესტიციების 2 %-ი მოდის, სოფლის მეურნეობაზე მხოლოდ 1 %-ი, სხვა დარგებზე კი ინვესტიციების 11 %-ი.
სტატისტიკური ინფორმაციის მიხედვით ირკვევა, რომ 2013 წლის 9 თვეში მშენებლობის სექტორში 55,4 მლნ დოლარის ინვესტიცია განხორციელდა, მაშინ როდესაც იმავე სექტორში 2012 წლის 9 თვეში 54 მლნ დოლარის ინვესტიცია იყო განხორციელებული. წელს აჭარაში ტურიზმის სექტორში მთლიანობაში განხორციელებულია 50,6 მლნ დოლარის ინვესტიცია (2012 წლის 9 თვე - 38 მლნ დოლარი). იანვარ-სექტემბერში მრეწველობაში განხორციელებული ინვესტიციების მოცულობამ 2,4 მლნ დოლარი შეადგინა (2012 წლის 9 თვე - 2,5 მლნ დოლარი), რაც შეეხება სოფლის მეურნეობას აქ 9 თვეში მხოლოდ 0,9 მლნ დოლარის ინვესტიცია განხორციელდა (2012 წლის 9 თვე - 2,5 მლნ დოლარი). აღსანიშნავია, რომ სხვა დანარჩენ დარგებში 9 თვეში 14,3 მლნ დოლარის ინვესტიცია განხორციელდა.