უკრაინის უმაღლესი რადას სხდომა 10 წუთის დაგვიანებით დაიწყო. უკრაინული მედიის ინფორმაციით, მას შემდეგ რაც დარბაზში პრემიერ- მინისტრი ნიკოლაი აზაროვი გამოჩნდა, ოპოზიციონერმა დეპუტატებმა დაიწყეს სკანდირება „სირცხვილი!".
ოპოზიციონერი დეპუტატები ასევე პრემიერისა და ვიცე პრემიერების ადგილებამდე მივიდნენ და იქ ევროკავშირის დროშები დაალაგეს.
მთავროვის წევრებმა ეს დროშები აიღეს. ამასთან ერთად, რეგიონების პარტიის დეპუტატები გამწკრივდნენ სამთავრობო ლოჯასთან იმის გამო, რომ ოპოზიციონერებისათვის იქ მისვლის საშუალება არ მიეცათ.
აზაროვმა სიტყვით გამოსვლა დაიწყო იმ მიზეზების ახსნით თუ რატომ მიიღო უკრაინამ ევროკავშირთან ასოცირების შესახებ შეთანხმების ხელმოწერისათვის მზადების შეჩერების შესახებ გადაწყვეტილება. ოპოზიციონერმა დეპუტატებმა ყვირილი დაიწყეს, რათა აზაროვის ხმა გადაეფარათ. ამის პასუხად აზაროვმა მათ განუცხადა, რომ მოესმინათ, ვინაიდან „ყვირილს ყოველთვის მოასწრებენ".