2014 წლის ბიუჯეტში პენსიების ზრდა გათვალისწინებული არ არის. ფინანსთა მინისტრობის კანდიდატს პენსიების ზრდაზე შეკითხვა „ნაციონალური მოძრაობის" წევრმა გიორგი ვაშაძემ დაუსვა, რაზეც ნოდარ ხადურის პასუხი იყო „თქვენმა მთავრობამ ხომ გახადა პენსია 100 დოლარი".
„საქართველოს 2014 წლის სახელმწიფო ბიუჯეტის შესახებ'' საქართველოს კანონის პროექტის მე-8 თავის 32-ე მუხლის - „საქართველოს შრომის, ჯანმრთელობისა და სოციალური დაცვის სამინისტროს განსახორციელებელი ღონისძიებების'' მიხედვით, 2014 წლისთვის, ყველა ასაკით პენსიონერთათვის სახელმწიფო პენსია კვლავ 150 ლარი რჩება. ეს ინფორმაცია ფინანსთა სამინისტროში გასაუბრების შემდეგაც დაგვიდასტურეს.
როგორც Fact Check-ი იუწყება, მათ მიერ მოძიებული ინფორმაციით, დასტურდება, რომ 2014 წლის ბიუჯეტში პენსიების ზრდა არ არის გათვალისწინებული. 2013 წელს ყველა ასაკით პენსიონერთათვის სახელმწიფო პენსია პირველი სექტემბრიდან 150 ლარამდე გაიზარდა. 2014 წლის ბიუჯეტის პროექტის მიხედვით, პენსიის ეს ოდენობა 2014 წლის განმავლობაში არ იცვლება. 2014 წლის გეგმით გათვალისწინებული საპენსიო უზრუნველყოფის ხარჯების 2013 წლის საპენსიო უზრუნველყოფის ხარჯებთან შედარებით 179 მილიონი ლარით მეტობა მხოლოდ თვეების რაოდენობებს შორის განსხვავებით არის გამოწვეული.
