საქართველოს სახელმწიფო საშინაო ვალის პრობლემათა შემსწავლელი სახელმწიფო კომისიის ამოქმედებას დადებითად აფასებს ექსპერტი ეკონომიკის საკითხებში ირაკლი ლექვინაძე. ლექვინაძე მიიჩნევს, რომ კომისია 90-იანი წლების დასაწყისში დაზარალებული მეანაბრეების პრობლემების შესწავლას.
„მე ვფიქრობ საშინაო ვალის შემსწავლელი კომისიის შექმნა უკავშირდება ქვეყნის შიდა ვალის დადგენას, 90-იანი წლების დასაწყისში დაზარალებული მეანაბრეების პრობლემების შესწავლას. მისასალმებელია, რომ საქართველოს მთავრობა ამ მიმართულებით ფიქრობს და 2014 წლის მანძილზე ამ კომისიის მუშაობის შედეგად იმედი მაქვს, შესაბამის დასკვნას დადებს. ეს საკითხი წლებია ღიაა და კონკრეტული გადაწყვეტილება რას აპირებს მთავრობა ამ საკითხთან მიმართებაში, მიუხედავად რამდენიმე წლიანი მცდელობისა, გადაუჭრელია. იმედია ახალი კომისია ამ საკითხთან დაკავშირებულ გაურკვევლობას წერტილს დაუსვამს"- აცხადებს ირაკლი ლექვინაძე.
როგორც ცნობილია, მთავრობამ საქართველოს სახელმწიფო საშინაო ვალის პრობლემათა შემსწავლელ სახელმწიფო კომისიას უფლებამოსილების ვადა, 2015 წლის 1-ელ იანვრამდე განესაზღვრა. როგორც მთავრობის №295 დადგენილებიდან ირკვევა, სახელმწიფო საშინაო ვალის პრობლემათა შემსწავლელი სახელმწიფო კომისიის მუშაობაში მონაწილეობას მიიღებენ პარლამენტის საფინანსო-საბიუჯეტო კომიტეტის თავმჯდომარე, პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, გენერალურ აუდიტორი, ქალაქ თბილისის მერი, თბილისის საკრებულოს თავმჯდომარის მოადგილე, საქართველოს ეროვნული ბანკის პრეზიდენტი და სსიპ - საქართველოს სტატისტიკის ეროვნული სამსახურის აღმასრულებელ დირექტორი
აღსანიშნავია, რომ საქართველოს სახელმწიფო საშინაო ვალის პრობლემათა შემსწავლელი სახელმწიფო კომისიის ძირითად ამოცანას „სახელმწიფო ვალის შესახებ" საქართველოს კანონის 48-ე მუხლის პირველი პუნქტით აღიარებული სახელმწიფო საშინაო ვალის ანაზღაურების მექანიზმთან დაკავშირებული რეკომენდაციების შემუშავება წარმოადგენს, რომელსაც კომისია შემდგომ მთავრობასა და პარლამენტს წარუდგენს.
კომისია უფლებამოსილია, მოითხოვოს და მიიღოს სამინისტროებიდან, უწყებებიდან, საწარმოებიდან და ორგანიზაციებიდან სახელმწიფო საშინაო ვალის და მის მართვასთან დაკავშირებით მუშაობისათვის საჭირო დოკუმენტები და ცნობები. ასევე შექმნას სამუშაო ჯგუფი, რომლის შემადგენლობაში შევლენ შესაბამისი სამინისტროების, უწყებების, ორგანიზაციების სპეციალისტები და დამოუკიდებელი ექსპერტები ეკონომიკურ საკითხებში;
კომისია უფლებამოსილია ასევე, საჭიროების შემთხვევაში თავის სხდომაზე მოიწვიოს სამინისტროების, უწყებების, საწარმოებისა და ორგანიზაციების დაინტერესებული და პასუხისმგებელი პირები.
რეგლამენტის მიხედვით, კომისიის სხდომა იმართება თვეში ერთხელ, საჭიროების შემთხვევაში კი კომისიის თავმჯდომარე უფლებამოსილია მოიწვიოს რიგგარეშე სხდომაც.
