საპარლამენტო უმრავლესობის წევრის თინა ხიდაშელის განცხადებით, მომავალმა პრემიერ-მინისტრმა ირაკლი ღარიბაშვილმა შს მინისტრის პოსტზე მისი შემცვლელი უკვე შეარჩია.
როგორც ხიდაშელმა დღეს გამართულ პრესკონფერენციაზე აღნიშნა, მისთვის ცნობილია ვინ იქნება ახალი შს მინისტრი, თუმცა ამ ეტაპზე მისი ვინაობის გამხელისგან თავს იკავებს.
"ვინ იქნება შინაგან საქმეთა მინისტრი, ამას ძალიან მალე გაიგებთ. მე ვიცი ამ კითხვაზე ზუსტი პასუხი, მაგრამ ნამდვილად არ მაქვს უფლება ამაზე ვილაპარაკო. მე პარლამენტის წევრი ვარ და ახლა თავს შევიკავებ იმაში ჩარევისგან, რაც ჩემი საქმე არ არის. მთავრობა მოვა პარლამენტში და შემდეგ უკვე გამოიხატება დამოკიდებულება მისი ყოველი წევრის და შემადგენლობის მიმართ,"- განაცხადა თინა ხიდაშელმა.
რაც შეეხება გავრცელებულ ინფორმაციას იმის შესახებ, რომ შესაძლოა შინაგან საქმეთა მინისტრის პოტზე სახელმწიფო დაცვის სპეციალური სამსახურის უფროსი ანზორ ჩუბინიძე დაინიშნოს, ხიდაშელის თქმით, დანამდვილებით შეუძლია თქვას, რომ აღნიშნული ინფორმაცია სიმართლეს არ შეესაბამება.