თვითონ უშუალოდ პრეზიდენტის სასახლეში, ადმინისტრაციის შენობაში ვინც ნამყოფია, დაინახავდა, რომ ეს არ არის საუნივერსიტეტო შენობა,- ამის შესახებ განათლების და მეცნიერების ყოფილმა მინისტრმა დიმიტრი შაშკინმა ავლაბრის რეზიდენციის სამომავლო ფუნქციების და აღნიშნულ შენობაში ქართულ-ამერიკული უნივერსიტეტის განთავსების საკითხის კომენტირებისას ისაუბრა.
შაშკინის თქმით, თუ მთავრობა აპირებს ავლაბრის რეზიდენციაში არსებული პირობები საგანმანათლებლო დაწესებულების ფუნქციონირებისთვის საჭირო პირობებად გარდაქმნას, ამას ძალიან ბევრი ფულის დახარჯვა დასჭირდება და ამ შენობაში ყველაფერის დანგრევა მოუწევთ.
"ადმინისტრაციის შენობაში უნივერსიტეტისთვის საჭირო პირობების მოწყობას ძალიან დიდი ფულის დახარჯვა დასჭირდება, როდესაც ეს შენობა უკვე იყო გამზადეული ბათუმში. მილენიუმთან მე მაქვს მოწერილი ხელი და 45 მილიონი დოლარი მიდიოდა მილენიუმის უნივერსიტეტზე. ჩვენ ამერიკელებთან შევთანხმდით, რომ ჩვენ შენობას ვაშენებთ და ისინი 45 მილიონს ფონდში დებდნენ იმისათვის, რომ ეს არ ყოფილიყო ძვირი და ჩვენი მოქალაქეებისთვის სწავლა ყოფილიყო უფასო. ახალი მთავრობის მოსვლის შემდეგ ეს შეთანხმება ჩაიშალა. მე როგორც ვიცი, ერთ-ერთი პარტნიორი ამერიკელებთან ერთად იყო კახა ბენდუქიძე, რომელიც ახლა სასამართლოში ჩივის იმის გამო, რომ ეს მოლაპარაკებები ჩაიშალა. იყო ამერიკული უნივერსიტეტი გამარჯვებული, რომელმაც პარტნიორი აირჩია საქართველოში და იმ მოგებული ტენდერის საფუძველზე ეს პარტნიორი იყო "თავისუფალი უნივერსიტეტი". ამ უნივერსიტეტს უკვე წელს უნდა მიეღო სტუდენტები,"- განაცხადა დიმიტრი შაშკინმა.
დღეს გავრცელებული ინფორმაციის თანახმად, ავლაბრის რეზიდენციაში ქართულ-ამერიკული უნივერსიტეტი განთავსდება.
