საქართველოს საგარეო საქმეთა მინისტრმა მაია ფანჯიკიძემ ქართული დიპლომატიის დღესთან დაკავშირებით, სოციალურ ქსელში მიმართვა გაავრცელა და კოლეგებს პროფესიული დღესასწაული მიულოცა.
„ჩემო ძვირფასო კოლეგებო, გილოცავთ პროფესიულ დღესასწაულს! ამ დღის აღნიშვნას საფუძველი არცთუ ისე დიდი ხნის წინ ჩაეყარა და ეს თარიღი გამოჩენილი ქართველი მწერლისა და საზოგადო მოღვაწის, სულხან-საბა ორბელიანის დაბადების დღეს უკავშირდება, რომელიც ისტორიაში ასევე შევიდა, როგორც თავისი ეპოქის გამჭრიახი და შორსმჭვრეტელი დიპლომატი.
მინდა დიპლომატიურ სამსახურში მყოფ ყველა პირს მადლობა გადავუხადო პროფესიული ერთგულებისა და ქვეყნის სამსახურისათვის.
სწორედ თქვენი პროფესიონალიზმის დამსახურებაა ის, რომ ჩვენი ქვეყანა დღეს, ისე როგორც არასდროს, ახლოს არის ისტორიულ მიზანთან.
საგარეო საქმეთა მინისტრად ყოფნის პერიოდში ჩემი ერთ-ერთი უმთავრესი ამოცანა სწორედ პროფესიული საქმიანობის განხორციელებაში თქვენი ხელშეწყობა და თანადგომა იქნება. ჩემი სურვილია საგარეო საქმეთა სამინისტრო თანამედროვე, ევროპული ტიპის სახელმწიფო უწყებად ჩამოყალიბდეს, იქცეს საერთაშორისო დონის, ძლიერ სახელმწიფო ინსტიტუტად. თქვენ უკვე იცით, რომ ჩვენ აქტიურად ვმუშაობთ ამ მიმართულებით და ახლო მომავალში, მთავრობასა და საზოგადოებას წარედგინება დიპლომატიური სამსახურის რეფორმირების პროექტი. სამუშაო პროცესში ჩვენ აქტიურად ვეცნობით და ვსწავლობთ ევროპული სახელმწიფოების მაგალითებს.
მიმდინარე წელს დიპლომატიური სამსახურის გამართულად მუშაობის უზრუნველსაყოფად მნიშვნელოვანი ნაბიჯები გადაიდგა: ქართულ დიპლომატიას კვლავ დაუბრუნდნენ პროფესიონალები - კარიერული დიპლომატები, რომელთა უმრავლესობა წინა წლებში მავანთა პოლიტიკური ანგაჟირების მსხვერპლნი და სამსახურიდან უსამართლოდ გათავისუფლებულნი იყვნენ.
ვაკანტურ თანამდებობებზე საჯარო კონკურსის გამოცხადებით ბევრი ნიჭიერი ახალგაზრდა მოვიზიდეთ უწყებაში; მიმდინარეობს როტაციის სისტემის დახვეწა, მისი სრულყოფა. დიდი ყურადღება ეთმობა დიპლომატების პროფესიულ ზრდას - სამინისტროს სასწავლო ცენტრი ამ მიმართულებით აქტიურად მუშაობს. ეს ყველაფერი არსებითია ჩვენი სამინისტროს უკეთ ფუნქციონირებისთვის.
მნიშვნელოვანი სიახლეები კიდევ იქნება და დარწმუნებული ვარ, ქართველი დიპლომატები ღირსეულად ვიდგებით სამშობლოს სამსახურის ავანგარდში", _ ნათქვამია ფანჯიკიძის განაცხადებაში.