პრეზიდენტის ადმინისტრაცია მთავრობას და იუსტიციის სამინისტროს მიმართავს და მოუწოდებს საქართველოს მოქალაქეობის მინიჭების პროცედურების გამარტივების მაქსიმალურად მოკლე ვადებში უზრუნველსაყოფად შესაბამისი ნაბიჯები გადაიდგას.
პრეზიდენტის ადმინისტრაციის უფროსის ანდრო ბარნოვის განცხადებით, სხვადასხვა კატეგორიის ადამიანებისთვის საქართველოს მოქალაქეობის მინიჭების პროცედურების გამარტივება სასარგებლო იქნება როგორც ქვეყნის ეკონომიკის განვითარებისთვის, ასევე საზოგადოების მაქსიმალურად ინტეგრირებულობისთვის.
"ჩვენ არაერთხელ გვითქვამს, რომ ჩვენი ქვეყნის განვითარებისთვის, წინსვლისთვის , ჩვენი ქვეყნის ნათელი მომავლისთვის არის ძალიან მნიშვნელოვანია, რომ ვიყოთ მაქსიმალურად ინტეგრირეულები გარესამყაროსთან. მინდა ყურადღება მივაქციოთ ზოგიერთ ისეთ ფაქტს, რომელიც ნამდვილად არ უწყობს ხელს ამ ყველაფერს. კერძოდ, საუბარი მაქვს იმაზე, რომ უკანასკნელ პერიოდში ჩვენ ძალიან ბევრი ადამიანი მოგვმართავს განცხადებით, რომლებიც მანამდე იუსტიციის სამინისტროს მიმართავდნენ მოქალაქეობის მიღების თაობაზე და იქიდან სრულიად გაუგებარი უარით ბრუნდებიან. ესენი არიან ჩვენი თანამემამულეები, რომლებიც არასოდეს ყოფილან საქართველოს მოქალაქეები, მაგრამ სურთ გახდნენ მოქალაქეები. აქ არიან ჩვენი ყოფილი მოქალაქეები, რომლებმაც მიიღეს სხვა ქვეყნის მოქალაქეობა და ამის გამო დაკარგეს საქართველოს მოქალაქეობა და ახლა უნდათ რომ ეს აღიდგინონ. ამ ადამიანების რიგში არიან უცხოელი ბიზნესმენები, რომლებიც დიდი ხანია საქართველოში მოღვაწეობენ, აქვთ სერიოზული ბიზნესი და ახლა უკვე მოქალაქეობის მიღების სურვილი აქვთ რათა კიდევ უფრო აქტიურად გააგრძელონ მოღვაწეობა, მით უმეტეს გაითვალისწინეთ ის შეზღუდვები, რომლებიც ახალმა მთავრობამ დაუწესა არა საქართველოს მოქალაქე ბიზნესმენებს. აქ არიან უბრალოდ სხვა ბიზნესმენებიც, რომლებსაც ახლა უნდათ ჩამოვიდნენ საქართველოში და დაიწყონ ბიზნესი. ეს ყველაფერი ცხადია, ხელს უწყობს საქართველოს განვითარებას, ჩვენი ეკონომიკის განვითარებას, ჩვენი საზოგადოების კეთილდღეობას და ცხადია, ეკონომიკის ზრდას. ჩვენთვის სრულიად გაუგებარია რატომ ბრუნდებიან ეს ადამიანები უარით იუსტიციის სამინისტროდან მაშინ, როცა არანაირი დასაბუთებული საფრთხე ამ ადამიანებისგან არ მომდინარეობს და ბოლო თვეების განმავლობაში, ალბათ მანამდეც ჩვენ ვცდილობდით, რომ იქ, სადაც ეს კითხვები რეალურად არ არსებობდა, მაქსიმალურად დაგვეკმაყოფილებინა ეს ადამიანები, მაგრამ ახლა, როდესაც მთავრდება მიხეილ სააკაშვილის პრეზიდენტობის ვადა, ჩვენ გვინდა მოვუწოდოთ მთავრობას და მოვუწოდოთ იუსტიციის სამინისტროს, რომ გადახედონ ამ პრაქტიკას და ჩვენ ერთხელ და სამუდამოდ უარი ვთქვათ გაუგებარ გადაწყვეტილებებზე, უარი ვთქვათ იზოლაციონიზმზე და მივცეთ ჩვენს ქვეყანას და ჩვენს საზოგადოებას საშუალება, რომ გავხდეთ მაქსიმალურად ინტეგრირებული და განვითარებული ერი,"- განაცხადა ანდრო ბარნოვმა.