საქართველოს პარლამენტის თავმჯდომარე დავით უსუფაშვილი "რესპუბლიკური პარტიის" თავმჯდომარის პოსტს დღეს დატოვებს.
როგორც "რესპუბლიკური პარტიის" ერთ-ერთმა ლიდერმა ლევან ბერძენიშვილმა "ჯი-ეიჩ-ენთან" საუბრისას აღნიშნა, უსუფაშვილი საპარლამენტო მოღვაწეობის პარალელურად პარტიულ საქმიანობას ვერ ახერხებს, ამიტომ მან პარტიის თავმჯდომარის პოსტის დატოვების გადაწყვეტილება მიიღო.
ბერძენიშვილის თქმით, მისთვის უცნობია ვინ შეიძლება გახდეს უსუფაშვილის შემცვლელი, რადგან დღეს დაგეგმილ "რესპუბლიკური პარტიის" ყრილობაზე პარტიის ეროვნულ კომიტეტს აირჩევენ და აღნიშნული ორგანო თავის მხრივ, "რესპუბლიკური პარტიის" ახალ თავმჯდომარეს აირჩევს.
"დასახელებულია ერონული კომიტეტის 78 კანდიდატი, 2 100 დეპუტატი იქნება ყრილობაზე, ისინი აირჩევენ ამ 78 კაციდან 35 კაციან ეროვნულ კომიტეტს და ეს ეროვნული კომიტეტი აირჩევს თავმჯდომარეს. ამიტომ, ჩემთვის წინასწარ აბსოლუტურად უცნობია ვინ იქნება ახალი თავმჯდომარე. ეს დემოკრატიული პარტიაა, აქ სერიოზული არჩევნები და შიდა პარტიული დემოკრატიაა, ამიტომ ჯერ-ჯერობით რთულია ახალი ხელმძღვანელის ვინაობის განსაზღვრა. ერთადერთი, რაც შემიძლია ვთქვა არის ის, რომ დავით უსუფაშვილმა ადრეც განაცხადა და ახლაც დაადასტურა, რომ პარლამენტის თავმჯდომარის პოსტი და "რესპუბლიკური პარტიის" თავმჯდომარეობა ერთდროულად ძალიან უჭირს, ამიტომ იგი პარტიაში დარჩება, რა თქმა უნდა ეროვნულ კომიტეტში იქნება, მაგრამ პარტიის თავმჯდომარე აღარ იქნება, ამიტომ გვეყოლება ახალი თავმჯდომარე, რომელიც მეხუთე იქნება ჩვენს ისტორიაში. რა თქმა უნდა პარლამენტის თავმჯდომარე "რესპუბლიკური პარტიის" თავმჯდომარეობას ვერ მოახერხებს, ეს შეუძლებელია, პარტიის ცენტრალური ოფისი თბილისშია და პარლამენტის თავმჯდომარე ქუთაისში. მარტო მიხეილ სააკაშვილს შეეძლო პარტიის თავმჯდომარეც ყოფილიყო და პრეზიდენტიც. თუ მართლა თავმჯდომარე იქნები, ვერც პრეზიდენტი იქნები, ვერც პარლამენტის თავმჯდომარე და ვერაფერი. ეს სრულიად ბუნებრივია და უსუფაშვილი არის თავდადებული რესპუბლიკელი და ასეთად დარჩება ყოველთვის, მე ამაში არასოდეს მეპარებოდა ეჭვი. ჩვენთვის თავიდანვე ცნობილი იყო, რომ პარლამენტის თავმჯდომარე პარალელურად პარტიის თავმჯდომარე ვერ იქნებოდა,"- განუცახდა "ჯი-ეიჩ-ენს" ლევან ბერძენიშვილმა და დაძინა, რომ სავარაუდოდ, "რესპუბლიკური პარტიის" ახალი თავმჯდომარის ვინაობა 4 ნოემბერს გახდება ცნობილი.
"უსუფაშვილმა უნდა ჩაატაროს ყრილობა და როდესაც დამთავრდება ეროვნული კომიტეტის არჩევნები, დღესვე ან 24 საათში უნდა ჩატარდეს ეროვნული კომიტეტის სხდომა, რომელიც აირჩევს პარტიის ახალ თავმჯდომარეს. სავარაუდოდ, დღეს საღამოს ან 4 ნოემბერს ჩატარდება ეს არჩევნები და ეროვნული კომიტეტი თავისი რიგებიდან, 35 კაციდან აირჩევს ერთს. ჩემი აზრით, ნაკლებად სავარაუდოა, რომ ისევ დავით უსუფაშვილის კანდიდაურა დააყენოს ვინმემ და ვფიქრობ, რომ ახალი თავმჯდომარე გვეყოლება,"- აღნიშნა ბერძენიშვილმა.
ლევან ბერძენიშვილმა პარტიის სამომავლო გეგმებზეც ისაუბრა და განმარტა, რომ გასული 1 წლის განმავლობაში "რესპუბლიკელები" საკმაოდ მოძლიერდნენ როგორც ცენტრალურ ხელისუფლებაში, ასევე ადგილობრივ თვითმმართველობებში, ამიტომ პარტიის გაჯანსაღების პროცესი გრძელდება და ახლა "რესპუბლიკურ პარტიას" "ყველაზე გავლენიანი პოლიტიკური ხანა" უდგას, თუმცა 20014 წლის ადგილობრივი თვითმმართველობის არჩევნებში მმართველი კოალიციისგან დამოუკიდებლად მონაწილეობას არ აპირებენ.
"რესპუბლიკური პარტია" მთელი ამ ერთი წლის განმავლობაში, რაც ჩვენ პარლამენტში ვართ, ძალიან სერიოზულად მუშაობდა რეგიონებში. ჩვენ ფაქტობრივად ყველა რეგიონში გვყავს ჩვენი წარმომადგენლები და ძალიან ბევრ ადგილას ჩვენ წარმოდგენილი ვართ ადგილობრივ ხელისუფლებაში და რა თქმა უნდა ვემზადებით ადგილობრივი არჩევნებისთვის, მაგრამ ჩვენ არ ვაპირებთ დამოუკიდებლად მონაწილეობას ადგილობრივ არჩევნებში, გასაგებია, რომ კოალიციუარდ მივიღებთ მონაწილეობას იმ დოზით, რა დოზითაც ვართ რეგიონებში წარმოდგენილი და კარგად ვართ წარმოდგენილი, რადგან ძალიან სერიოზული სამუშაოები ჩატარდა და ტარდება ახლაც. პარტიას ყრილობაზე მარტო 2 000 კაცზე მეტი ეყოლება, ასეთი რამ ჩვენ არასოდეს გვქინია, არასოდეს ამდენ ხალხიანი ყრილობა არ გვყოლია, ძნელი წარმოსადგენი იყო ძველ დროში. რეპუბლიკური პარტია თავისი წარმომადგენლობით, პარლამენტში 9 კაციანი ფრაქციით, პარლამენტის თავმჯდომარით, 2 კომიტეტის თავმჯდომარით, რამდენიმე კომიტეტის პირველი მოადგილით, ერთი მინისტრით, ერთი მინისტრის მოადგილით და სხვა, თავის ისტორიაში ყველაზე უფრო გავლენიან ხანას მოითვლის,"- განაცხადა ლევან ბერძენიშვილმა.