საპარლამენტო უმცირესობის ლიდერის დავით ბაქრაძის განცხადებით, პარლამენტის შენობის ქუთაისში ფუნქციონირებას ამ ქალაქისთვის სტრატეგიული და საციცოცხლო მნიშვნელობა აქვს, ამიტომ ქვეყნის უმაღლესი საკანონმდებლო ორგანოს დედაქალაქში დაბრუნება დაუშვებელია.
როგორც ბაქრაძემ ქუთაისის პარლამენტის შენობასთან დღეს გამართულ საპროტესტო აქციაზე აღნიშნა, აუციელებელია ქვეყნის პოლიტიკური ცენტრი ქუთაისში იყოს წარმოდგენილი და ყოფილი ხელისუფლების მიერ წამოწყებული პროექტები უნდა გაგრძელდეს.
"თუ ქუთაისიდან გაისად გადავიდა პარლამენტი, თუ ქუთაისში დამთავრდა იმ პოლიტიკური ცენტრის შექმნის პროექტი, რომელიც ჩვენ დავიწყეთ, გაისად ქუთაისს გვერდს აუვლის ცენტრალური ავტომაგისტრალიც და გამოვა, რომ ქუთაისი დარჩება იზოლირებული, მოწყვეტილი ქალაქი, რომელსაც არ ექნება განვითარების პერსპექტივა. აქედან გამომდინარე, ჩვენ მივიჩნევთ, რომ ქუთაისში უნდა დარჩეს პარლამენტიც, უნდა გადმოვიდეს ქვეყნის პოლიტიკური ცენტრიც და ამ გზით უნდა განვითარდეს ეს ქალაქი და მთლიანად იმერეთის რეგიონი,"- განაცხადა დავით ბაქრაძემ.
ქუთაისში, პარლამენტის შენობასთან დღეს საპროტესტო აქცია გაიმართა. მომიტინგეები კონსტიტუციაში შესატან იმ ცვლილებას აპროტესტებდნენ, რომლის თანახმად, ქვეყნის მთავარ საკანონმდებლო დოკუმენტში ქუთაისი პარლამენტის ადგილსამყოფელ ქალაქად არ იქნება მითითებული და უმაღლესი საკანონმდებლო ორგანო ფუნქციონირებას თბილისში გააგრძელებს.
