რუსეთთან ურთიერთობის საკითხებში საქართველოს პრემიერ-მინისტრის სპეციალური წარმომადგენელი ზურაბ აბაშიძე რუსეთის ფედერაციის საგარეო საქმეთა სამინიისტრის განცხადებას იმის შესახებ, რომ ნოემბერში დაგეგმილი ჟენევის მოლაპარაკებების მორიგი რაუნდი რუსთისთვის ძალიან მნიშვნელოვანია, პოზიტიურად აფასებს და გამორიცხავს, რომ აღნიშნული მოლაპარაკებების ფორმატში რაიმე ცვლილებები შევიდეს.
აბაშიძის თქმით, ნოემბერში დაგეგმილ ჟენევის მოლაპარაკებების მორიგ რაუნდზე საუბარი 2008 წლის რუსეთ-საქართველოს ომის შედეგებს შეეხება.
"განიხილება ის საკითხები და პრობლემები, რომლებიც 2008 წლის ომის შედეგად წარმოიშვა. ეს არის უსაფრთხოების პრობლემები, ჰუმანიტარული პრობლემები და სხვა საკითხები. ვნახოთ, ერთია საუბარი და პოზიტიური განწყობა, მაგრამ ძალიან მნიშვნელოვანია რეალურად რა შედეგებს მოიტანს ეს რაუნდი და იქნება თუ არა იქ რაღაც ახალი პოზიტიური ელემენტი. ამის წინასწარმეტყველება მე ნამდვილად არ შემიძლია, მაგრამ ჩვენი დელეგაცია ამისათვის მზად არის,"- განაცხადა ზურაბ აბაშიძემ.
ჟენევის მოლაპარაკებების მორიგი რაუნდი 5 -6 ნოემბერს გაიმართება.